साउन २९ बाजुरा । बाजुराको हिमाली गाउँपालिका वडा नम्बर–१ बिच्छ्यामा बाढीले एघार घर बगाएको छ । बिच्छ्या खोलामा बुधवार राति आएको बाढीले गाउँपालिकाको वडा नम्बरं १, ३ र ५ मा गरी ११ घर बगाएको हो ।
त्यसैगरी ७ घरमा क्षति भएको छ भने १७ घर जोखिममा रहेको छ । जिल्ला प्रहरी कार्यालयका प्रहरी निरीक्षक देवबहादुर चौधरीले कवाडी प्रहरीचौकीको टोली बाढी प्रभावित क्षेत्रमा पुगेर तथ्यांक संकलन गरेको जानकारी गराउदै बाढीले ११ घर बगाउनुका साथै ७ घरमा क्षति भएको र १७ घर जोखिममा परेको बताए ।
बाढीले हिमाली गाउँपालिका वडा नम्बर–५ का नवराज बुढा, देवीलाल चदारा, विरवल चदारा, अजय चदारा, हिउँसरा लुहार, अङ्गविर चदारा,बलबहादुर चदारा, मुगा लुहार, देबीलाल बुढथापा, वीरभान लुहार र डवल लुहारको गरी ११ घर बगाएको प्रहरी निरीक्षक चौधरीले बताए ।
त्यसैगरी हिमाली गाउँपालिका वडा नम्बर–१ का नरेन्द्रबहादुर बुढा, छञ्चलाल थापा, धनसिंह थापा, सब्बले थापा, लालबहादुर थापा, सुजलाल थापा, गोवतल थापाको घर, पसल र खेतबारीमा क्षति पुर्याएको प्रहरी निरीक्षक चौधरीले जानकारी गराए ।
बाढीका कारण हिमाली गाउँपालिका वडा नम्बर–१ का विच्छ्याका सुजलाल थापा, धनसिंह थापा, जबैलाल थापा, धनबहादुर थापा, चन्द्रापति थापा, धर्मलाल थापा, बलचन्द्र थापाको घर जोखिममा परेको प्रहरी निरीक्षक चौधरीले बताए ।
स्थानीय उने थापा, लालसिंह बोहरा, डिलबहादुर थापा, हरिलाल थापा, भउरलाल थापा, चन्द्रवान थापा, रत्नपति थापा, गोबनल थापा, धर्मजीत थापा र लक्ष्मण थापाको घर पनि बाढीका कारण उच्च जोखिममा रहेको उनले बताए ।
बाढीले सरकारी कार्यालय, विद्यालय र सार्वजनिक संरचना समेतमा क्षति पुगेको जानकारी गराउदै उनले १ नम्बर वडा कार्यालय, विच्छ्या मावि, स्वास्थ्य चौकी, स्थानीय विद्युत लाइन्, झोलुङ्गे पुल, नेटा र देउसैनको पानी घट्टसमेत जोखिममा परेको प्रहरी निरीक्षक चौधरीले जानकारी गराए ।
