जेठ ०४ धनगढी । चुनावी खर्च घटाउन मौन अवधि घटाउनु पर्ने धनगढीमा आयोजित एक कार्यक्रमका सहभागीहरुले जोड दिएका छन् । मौन अवधिमा सबैभन्दा बढी खर्च हुने भएकाले घटाउनु पर्नेमा उनीहरूले जोड दिएका हुन ।
इन्टरनेसनल आइडियाले आयोजना गरेको कार्यक्रममा निर्वाचन खर्च घटाउन सबै तहको एकसाथ निर्वाचन गराउनु पर्ने, उम्मेदवार छनौटमा ध्यान दिनुपर्ने लगायतका विषयमा उनीहरूले सुझाव दिएका छन ।
चुनावमा हुने खर्चले महिलाको राजनीतिक प्रतिनिधित्व घटाइरहेको उनीहरुले बताएका छन । प्रदेश सभा सदस्य जानकी ऐर बमले पैसाको बार्गेनिङ गरेर टिकट माग्ने परिपाटी मौलाएको बताउदै महिलालाई टिकटको कुरा उठ्ने बित्तिकै आर्थिक कुरा जोडेर पछाडि हट्न दबाब आउने गरेको बताइन् ।
पार्टी वा नेताहरूले आर्थिक जोहो गर्न सक्ने वा नसक्ने भनेर सोध्ने गरेको उनले बताईन । अर्का प्रदेश सभा सदस्य खेमादेवी विष्टले महिलालाई राजनीति गर्न धेरै कठिन भएको बताईन ।
त्यसैगरी प्रदेश सभा सदस्य लक्ष्मी विकले महिला र दलितलाई टिकट दिनु भनेको हार्नलाई दिनु हो भन्ने मानसिकता रहेको बताइन् । त्यसैगरी, निर्णायक मतमा पनि पैसा बाँड्ने प्रतिस्पर्धा हुने गरेको उनीहरुले बताउका छन ।
टिकट पाउन देखि लिएर चुनावी प्रचार प्रसारमा होडबाजी, कार्यकर्ता खुसी राख्न उनीहरूलाई नास्ता, खाना लगायत गर्दागर्दै चुनावको क्रममा अत्यधिक खर्च हुने गरेको बताउदै उनीहरुले जसले गर्दा महिला प्रतिनिधित्व घटिरहेको बताएका छन ।
स्थानीय तहको निर्वाचनमा अझ बढी खर्च हुने गरेको बताउदै कार्यक्रका सहभागीहरुले २०७४ कोभन्दा पनि २०७९ को निर्वाचनमा अझ बढी खर्च बढेको बताएका छन । दोधारा चाँदनी नगरपालिकाका वडाध्यक्ष भक्तराज सुनारले तीन वटा चुनाव जितेको अनुभव सुनाउँदै २०५४ सालमा कुनै पनि खर्च नगरी चुनाव जितेको बताए ।
२०७४ मा मोबाइल खर्च सबैलाई दिएको बताउदै उनले २०७९ मा कार्यकर्तालेसँगै घुमेको भन्दै घर चलाउन खर्च माग्न थालेको बताए । पुनर्वास नगरपालिकाका उपप्रमुख भुलियादेवी रानाले आत्मनिर्भर भएर महिलालाई राजनीति गर्न कठिन रहेको बताउदै आत्मनिर्भर भएर महिलालाई राजनीति गर्न गाह्रो भएको बताईन । कार्यक्रम्मा उक्त विषयमा मानुषी एमी भटराईले आफ्नो प्रस्तुती प्रस्तुत गरेकी थिईन ।
