जेठ ०४ धनगढी । कैलाली–कञ्चनपुरबाट भन्सार छलीको सामान बरामद गरिएको छ । कैलालीको धनगढी उपमहानगरपालिका वडा नम्बर–३ को मिलनचोक, ट्राफिक चौराहा, राष्ट्रिय परीक्षा बोर्ड नजिक तथा मनेहरा क्षेत्रबाट प्रहरीले अन्दाजी ५८ हजार आठ सय बराबरको चिनी, मिश्री, मिठाई, पास्ता, बिडी, सुर्ती लगायतका सामग्रीहरू फेला पारी बरामद गरेको हो ।
जिल्ला प्रहरी कार्यालय कैलाली तथा मातहत प्रहरी टोलीको गस्तीका क्रममा उक्त सामानहरू बेवारिसे अवस्थामा भेटिएका थिए ।
त्यसैगरी कञ्चनपुरको भीमदत्त नगरपालिका वडा नम्बर–९ ब्रह्मदेव र बेलडाँडी गाउँपालिका वडा नम्बर–३ वैवाहबाट अन्दाजी ४६ हजार नौँ सय बराबरको खेलौना, गहुँ, हाडवेयर सामग्री, किराना लगायतका वस्तुहरू बरामद गरिएको छ ।
उक्त सामान प्रहरीको गस्ती टोलीले वेवारिसे अवस्थामा फेला पारी बरामद गरेको हो । बरामद गरिएको सामग्री आवश्यक कारबाहीका लागि सम्बन्धित निकायमा बुझाइएको बताइएको छ ।
