जेठ ०४ धनगढी । आगलागीजन्य विपद्का समयमा तत्काल पानी प्राप्त गरी प्रतिकार्य गर्ने उद्देश्यले धनगढी उपमहानगरपालिकाले नगर क्षेत्रका आठ वटा स्थानमा ‘फायर हाइड्रेन्ट’ जडान गरेको छ ।
आगलागीबाट हुने क्षति न्यूनीकरणका लागि उपमहानगरपालिकाले आठ वटा स्थानमा ‘फायर हाइड्रेन्ट’ जडान गरेको हो । धनगढीको चौराहा, भौतिक पूर्वाधार विकास मन्त्रालय, भेटेरिनरी अस्पताल, जिल्ला प्रशासन, नेपाल राष्ट्र बैङ्क अगाडि, सहिद गेट, बुद्धचोक र शिवनगर गरी आठ वटा स्थानमा फायर हाइड्रेन्ट जडान गरिएको उपमहानगरपालिकाले जानकारी गराएको हो ।
हाल आगलागी भएमा दमकल आगो निभाउन जाने भए पानी भर्न पुनः नगरपालिकाको कार्यालयमै आउनुपर्ने बाध्यतालाई मध्यनजर गर्दै फायर हाइड्रेन्ट जडान गरिएको बताइएको छ ।
आगलागीका घटना भएमा दमकललाई पानी भरेर आगो निभाउन सहज हुने र फायर हाइड्रेन्ट नजिक आगलागी भएमा त्यसमा जेटपम्प लगाएर आगो निभाउन सकिने बताइृएको छ ।
क्षति न्यूनीकरणमा निकै सहयोग पुग्ने भएकाले उपमहागरले नगर क्षेत्रका १९ वटै वडामा थप फायर हाइड्रेन्ट जडान गर्ने योजना बनाइरहेको नगर प्रमुख गोपाल हमालले बताएका छन ।
