चैत्र ११ कञ्चनपुर । कञ्चनपुरका प्रमुख जिल्ला अधिकारी नारायण प्रसाद सापकोटाले जात सोधेर घर भाडामा नदिनेलाई कारवाही गरिने प्रतिबद्धता गरेका छन् । प्रमुख जिल्ला अधिकारी सापकोटाले जिल्ला प्रशासन कार्यालयमा लिखित निवेदन आए जात सोधेर घर भाडामा नदिनेलाई कारवाही गरिने प्रतिबद्धता गरेका हुन ।
‘कसैले मेरो घर भाडामा दिदैन भन्न सक्छ, त्यो उसको अधिकारको कुरा हो, तर जात सोधेर तपाईलाई घर भाडामा दिन्न भन्न पाउँदैन, कानुनी रुपमा यो गर्न पाईदैन’ प्रमुख जिल्ला अधिकारी सापकोटाले भने । सुदूरपश्चिम विश्वविद्यालयको कानुन संकायमा अध्ययनरत तुलसी विकले जातका कारण भाडामा कोठा नपाए पछि संयुक्त दलित संंघर्ष समितिले प्रमुख जिल्ला अधिकारी सापकोटा मार्फत प्रधानमन्त्री तथा मन्त्रिपरिषद् कार्यालयलाई ज्ञापन बुझाएको छ ।
प्रमुख जिल्ला अधिकारी सोपकोटाले ज्ञापन पत्र सम्बन्धित निकायमा पठाउने र कोठा भाडा सम्बन्धि स्थानीय तहका प्रमुखसंग छद्धलफलका लागि आग्रह गर्ने बताए । ज्ञापन पत्रमा स्थानीय तहले घर भाडामा दिने सबै घरधनी सूचीकृत गरी सबैलाई भाडामा दिन सकिने व्यवस्था गर्न ज्ञापन पत्रमा माग गरिएको छ ।
विश्वविद्यालयको कानुन संकायमा छैठौ सेमेष्टरमा अध्ययनरत दैलेखकी बिकले जात सोधेर डेरा नपाएको पीडा सामाजिक सञ्जालबाट सार्वजनिक गरेकी थिइन् । दुई वर्षदेखि विश्वविद्यालयमा अध्ययनरत विकको पीडा बाहिर आए पछि सोमबार समितिले छलफल गरी प्रमुख जिल्ला अधिकारीलाई ज्ञापन बुझाएको हो ।
विद्यार्थी विक सहित समितिका सदस्यहरु ज्ञापन बुझाउन जिल्ला प्रशासन कार्यालय कञ्चनपुर पुगेका थिए । विद्यार्थी विकले प्रमुख जिल्ला अधिकारी सापकोटालाई आफ्नो पीडा सुनाएकी थिईन । आफूले डेराका लागि विश्वविद्यालय आशपास क्षेत्रका सबै घर पुगेको बताइन् ।
‘कोठा हेर्न जान्छु, कोठा छ भन्नु हुन्छ, जात सोधेपछि दलित हुँ भन्ने थाह पाएपछि हुँदैन भन्छन्’ उनले भनिन‘मलाई यसरी जातीय विभेद हुन्छ भन्ने थाह थिएन, कोठा पाउँदैन भन्ने थाह थिएन ।’ जातका कारण कोठा नपाए पछि आफू मानसिक रुपमा पीडामा परेको समेत उनले सुनाइन् ।
संघर्ष समितिका अध्यक्ष गणेश नेपालीको नेतृत्वको टोलीले प्रमुख जिल्ला अधिकारी सापकोटाको कार्यकक्षमा गएर ज्ञापन बुझाएको हो । मुक्ति समाज कञ्चनपुरका अध्यक्ष राजेन्द्र आग्रीले ज्ञापन वाचन गरेर सुनाएका थिए ।
नेकपा एकीकृत समाजवादीका केन्द्रीय सल्लाहकार प्रताप तिरुवा, नेकपा माओवादी केन्द्रका सुदूरपश्चिम प्रदेश कमिटी सदस्य गणेश विक, मुक्ति समाजका केन्द्रीय सदस्य रमेश तिरुवा, नेकपा समाजवादीका विनोद नेपाली, अधिकारकर्मी नरेश सिलाल लगायतका नेताहरु जिल्ला प्रशासन कार्यालय कञ्चनपुर पुगेका थिए ।
