चैत्र ११ धनगढी । नयाँ वर्षको दिन बैशाख १ गते अब धनगढी दौडिन्छ’ हाफ म्याराथन प्रतियोगिताको ११ औं संस्करण हुने भएको छ । सोमबार धनगढीमा पत्रकार सम्मेलन गरी आयोजक धनगढी जेसिजले बैशाख १ गते ‘अब धनगढी दौडिन्छ’ हाफ म्याराथन प्रतियोगिताको ११ औं संस्करण हुने जानकारी गराएको हो ।
धनगढी जेसिजले नया बर्ष २०८२ बैशाख, १ गतेका दिन ‘अब धनगढी दौडिन्छ’ हाफ म्याराथन प्रतियोगिता ११ औं संस्करण आयोजना गर्ने भएको हो । धनगढी जेसिजले सन् २०१४ बाट यो प्रतियोगिता नियमित रुपमा नयाँ वर्षको दिन आयोजना गर्दै आइरहेको बताईएको छ ।
प्रतियोगिताको १० औं संस्करण देखि नेपाल एथलेटिक्स संघबाट स्वीकृत प्राप्त गरिसकेको आयोजकले जनाएको छ । हाफ म्याराथनको विजेताले नगद ७५ हजार, उप–विजेताले ५० हजार र तेश्रो हुनेले नगद २५ हजार प्राप्त गर्ने बताईएको छ । हाफ म्याराथन धनगढी रंगशाला देखि सुरु भएर गेटास्थित मनेहरा पुल हुँदै पुनः धनगढी रंगशाला पुगेर समापन हुने संयोजक दिपक गौतमले बताए ।
त्यसैगरी प्रतियोगिता अन्तर्गत महिलातर्फ तथा कर्पोरेट र संचारको ५ कि.मी.दौड आयोजना गरिने उनले बताए । धनगढी जेसिजका महासचिव आशिष शाहले विजेताले ७ हजार ५ सय रुपैयाँ प्राप्त गर्ने जानकारी गराउदै उप–विजेताले ५ हजार र तेस्रो हुनेले २ हजार ५ सय रुपैयाँ प्राप्त गर्ने जानकारी गराए ।
खेलकुदको माध्यमबाट युवाहरुलाई विकासमा प्रोत्साहन गर्ने उद्देश्यले आयोजना हुदै आएको प्रतियोगितामा धावक नेपाली सेना, सशस्त्र प्रहरी, नेपाल प्रहरी लगायतको सहभागिता हुने जेसिस धनगढीका अध्यक्ष लोकराज भट्टले जानकारी गराए ।
नयाँ वर्ष २०८१ का अवसरमा आयोजित हाफ म्याराथन प्रतियोगितामा मुकेशबहादुर पाल प्रथम भएका थिए । उनले २१ किलोमिटर दूरीको हाफ म्याराथन एक घण्टा सात मिनेट ५७ दशमलव ३५ सेकेन्डमा पूरा गर्दै प्रथम स्थान प्राप्त गरेका थिए ।
