फागुन ०१ धनगढी । धनगढी उपमहानगरपालिका वडा नम्बर–३ बोराडाँडीका सुरेश विश्वकर्माले नर्सरी व्यवसायबाट मासिक ४० हजार बचत गर्दै आएका छन् । जीविकोपार्जनका लागि विदेश जानुपर्छ भन्ने मान्यता विपरीत उनले ‘कान्तिपुर नर्सरी’ व्यावसायिक रुपमा सञ्चालन गरी मासिक ४० हजार बचत गर्दै आएका हुन ।
धनगढी उपमहानगरपालीका वडा नम्बर–८ बुद्धचोक बसोबास गर्दै आएका विश्वकर्माले काठमाडौँको बिरुवा सम्बन्धी काम गर्ने वायोप्लान्टिक प्राइभेट लिमिटेड कम्पनीमा लामो समय काम गरी बिरुवा सम्बन्धी कामको अनुभव लिएको बताए । त्यसपछि गाउँ फर्किएर नर्सरी व्यवसाय सुरु गरेको बताउदै विश्वकर्माले वार्षिक एक लाख ५० हजार तिर्ने गरी चार कट्टा जमिन भाडामा लिई व्यवसाय गर्दै आएको बताए ।
विगत १३ वर्ष देखि नर्सरी व्यवसाय सम्बन्धी कामको अनुभव लिएका उनले पछिल्लो पाँच वर्षदेखि धनगढीको बोराडाँडीमा ५० लाख लगानीमा व्यवसाय सञ्चालन गरेका छन । मासिक ४० हजार बचत हुँदै आएको बताउदै उनले छ जना परिवारको सम्पूर्ण खर्च, छोराछोरीको शिक्षामा खर्च यही आम्दानीबाट हुने गरेको बताए ।
तीन जनालाई रोजगारी समेत दिएको बताउँदै उनले तलब बाफत मासिक ३६ हजार खर्च लाग्ने गरेको बताए । अन्य भन्दा यस व्यवसायमा जोखिम पनि बढी भएको बताउदै उनले कहिलेकाही प्रतिकूल वातावरणका कारण बिरुवामा विभिन्न सङ्क्रमण देखा परी बिरुवा बिग्रने, कुहिने, रोग लाग्ने जानकारी गराए ।
जसले गर्दा घाटा पनि व्यवहोर्नुपर्ने बताउदै उनले व्यवसायमा कहिले घाटा, कहिले नाफा हुने भए पनि धैर्यताका साथ मेहनत गरे व्यवसायले सन्तुष्टी दिने बताए । अहिलेसम्म पैसाका लागि कसैसँग हात फैलाउनु नपरेको बताउदै उनले नेपालको झापा, विराटनगर, इटहरी र कञ्चनपुर लगायतका स्थानबाट विभिन्न जातिका फलफूल,प्यान्टसहित विभिन्न बिरुवा आयात गरेर बिक्री गर्दै आएको बताए ।
केही बिरुवा नर्सरीमा आफँै उत्पादन गरेर पनि बिक्री गर्ने गरेको उनले बताए । नर्सरीमा हाल विभिन्न जातका फलफूल, सो–प्यान्ट लगायत बिरुवा उपलब्ध भएको उनले बताए ।
