फागुन ०१ धनगढी । ऊर्जा जलस्रोत तथा सिँचाइमन्त्री दीपक खड्का र भारतका जलशक्ति मन्त्री सिआर पाटिलबीच भारतमा भएको भेटवार्तामा पञ्चेश्वर बहुउद्देश्यीय आयोजना अघि बढाउने विषयमा सहमति भएको छ ।
भारतको राजधानी नयाँ दिल्लीमा आयोजना गरिएको इन्डिया इनर्जी वीक–२०२५ मा सहभागी हुन गएका मन्त्री खड्का र भारतीय मन्त्री पाटिलबीच आयोजना निर्माणको प्रारम्भिक विस्तृत परियोजना प्रतिवेदन (डिपिआर) यथाशीघ्र अन्तिम रूप दिने सहमति भएको वरिष्ठ ऊर्जा विज्ञ प्रवल अधिकारीले जानकारी दिए ।
यसका साथै, टनकपुर देखि नेपाल–भारत सिमाना सम्मको लिंक नहर निर्माण सम्पन्न भइसकेकोले महाकाली सन्धि अनुसार पानी सञ्चालनको कार्यविधि अन्तिम रूप दिन दुबै पक्ष तयार रहेको अधिकारीले बताए ।
बाढी तथा डुवान व्यवस्थापनका लागि नेपाल–भारत संयुक्त समितिको १४ औं बैठक आगामी मार्च २२–२४ मा गर्ने सहमति समेत भएको छ । बैठकका लागि नेपाल सरकारले औपचारिक पत्राचार गर्ने तयारी गरिरहेको बताईएको छ ।
ऊर्जामन्त्री खड्काले पछिल्लो उच्चस्तरीय भेटघाट तथा छलफलबाट नेपाल–भारतबीच जलस्रोत क्षेत्रमा सहकार्य मजबुत हुने विश्वास व्यक्त गरेका छन । भारतीय जलशक्तिमन्त्री पाटिलले पञ्चेश्वर आयोजनाको डिपिआर छिट्टै टुंग्याइ आयोजनालाई द्रुत गतिमा अघि बढाउने प्रतिबद्धता जनाएका छन् ।
