माघ २५ बाजुरा । सदरमुकाम मार्तडी नजिकैको मार्तडी घट्मुना सडक खण्ड बाउलीगाड अर्थात् ठुलीसाँघुमा पक्की पुल निर्माणको काम सुरु भएको छ । सम्झौता सकिन एक महिना बाँकी हुँदा ठेकदार सम्र्पकमा आएर काम सुरु भएको हो ।
३ वर्षभित्र निर्माण सक्ने गरी २०७७ फागुन १० गते सम्झौता गरिएको उक्त पुलको सम्झौता अनुसार आगामी फागुन ९ गतेसम्म सम्झौता सकिने भएको छ । ठेकेदारको बदमासीका कारण सम्झौता मिति सकिन लाग्दा काम सुरु गरिएको हो ।
बडीमालिका नगरपालिका प्रमुख अमर खड्काले नगरपालिकाले निग्रानी बढाएको बताउदै काम नसकुन्जेल योजनामा निग्रानी राख्ने बताए । बडीमालिका नगरपालिकाका नगर प्रमुख खड्काले समयमै काम सक्न निर्देशन गर्नुका साथै हरेक दिन आफै अनुगमन गर्ने र दिन भर भएको कामको विवरण माग्ने कार्य भईरहेको बताए ।
ठेकेदार कम्पनी बिकोई बिल्डर्स प्रा.लि.टंगाल काठमाण्डौंले निर्माण कार्य सुरु गरेको व्यवस्थापक अरुण भट्टराईले बताए । महाकाली पुल योजना महेन्द्रनगरका इन्जिनियर सन्तोष चन्दले १६ करोड २१ लाखमा सम्झौता गरिएको उक्त पुलको ६ पटक पत्राचार गर्दा पनि बेवास्ता गरेको ठेकेदार कम्पनी सम्पर्कमा आएर काम सुरु गरेको बताए ।
३० मिटर लम्बाई र ११ मिटर चौडाइको उक्त पक्की पुल निर्माण हुने भए पछि जिल्लाका तीन वटा स्थानीय तहका नागरिकलाई सहज हुने उनले बताए । वर्षेनी वर्षात्को समयमा गौमुल गाउँपालिका, बडीमालिका नगरपालिका र खप्तड छेडेदह गाउँपालिकाका नागरिकहरु हाल सास्ती खेप्दै आईरहेका छन् ।
