माघ २५ धनगढी । कैलालीको कैलारी गाउँपालिका वडा नम्बर ३ स्थित सुर्मीनाला मोटरेबल पुल ठेकेदारका कारण अलपत्र परेको छ । निर्माण कम्पनी थेगिन कन्स्ट्रक्सन कम्पनीको चरम लापरबाहीका कारण पुल अलपत्र परेको हो । पुल निर्माणका लागि पूर्वाधार कार्यालय कैलाली र थेगिन कन्स्ट्रक्सन बिच डेढ वर्षभित्रै निर्माण सम्पन्न गर्ने गरी २०७७ साल साउन १८ गते सम्झौता गरिएको थियो । सम्झौता अनुसार निर्माण कम्पनीले २०७८ पुस १८ गतेभित्र पुल निर्माण सम्पन्न गर्नुपर्ने भए पनि ४ वर्ष बितीसक्दा पनि पुल निर्माणको काम अलपत्र परेको हो ।
पुल अलपत्र छोडेर निर्माण कम्पनी भागेको स्थानीयले बताएका छन् । स्थानीय फागुराम चौधरीले निर्माण कार्य छोडेर कम्पनी भागेको बताए । उनले केही समय अगाडि कामदारहरू काम गर्न आएको बताउदै कामदारहरुको ज्याला भुक्तानी नभए पछि कामदारहरू काम गर्न छोडेर गएको उनले बताए । पक्की पुल निर्माणस्थलमा यसअघि स्थानीयवासीले आवत जावतको लागि काठे पुल बनाएको बताउदै उनले सोही काठे पुलमार्फत बर्षौसम्म गुजारा चलाएको बताए ।
काठे पुल विस्थापन गर्न सुदूरपश्चिम प्रदेश सरकार मातहतको पूर्वाधार कार्यालयले पुल निर्माणका लागि ४ करोड ९६ लाख ९१ हजार ४ सय ९३ रुपैयाँ बजेट सहित थेगिन कन्स्ट्रक्सन कम्पनीसँग सम्झौता गरिएको थियो । हालसम्म निर्माण सम्पन्न नहुँदा स्थानीयवासीले सास्ती खेप्नु परेको स्थानीय गीता चौधरीले बताईन । पानी परेपछि हिँड्नै नसकिने बताउदै उनले बर्षातमा आएको बाढीले पुल नहुँदा एक घण्टाको घुमाउरो बाटो हिँड्नुपर्ने बाध्यता रहेको बताईन ।
खोला वारी र पारी बरकामुराका साथै अन्य गाउँहरू पर्ने बताउदै उनले वारिका स्थानीयवासीको खेतबारी खोला पारी भएको र खोला पारीका स्थानीयको खेतबारी वारी भएको बताईन । उनीहरूले खेतबारीको कामसहित दैनिक जीवन यापनका लागि त्यही बाटो प्रयोग गर्नुपर्ने बताउदै उनले पुल नबन्दा स्थानीयले सास्ती खेप्नु परेको बताईन । पुल समयमा नबनेपछि स्कुले बालबालिका समेत अप्ठेरोमा परेको उनले बताईन ।
जोखिम मोलेर त्यो बाटो प्रयोग गर्नुपर्ने बताउदै उनले एक घण्टाको घुमाउरो बाटो प्रयोग गर्नुपर्ने बताईन । हसुलिया बजारमा रहेको विद्यालयमा अध्ययनरत खोला पारी घर भएकी बरकामुराकी दुर्गा चौधरीले पुल नबन्दा जोखिम मोलेर यात्रा गर्नुपर्ने बाध्यता रहेको बताईन । पूर्वाधार विकास कार्यालय धनगढीका प्रमुख रामचन्द्र खत्रीले पनि निर्माण व्यवसायीको काम गर्ने नियत राम्रो नभएको बताए । पटक–पटक ताकेता गर्दा पनि निर्माण कम्पनीले काम नगर्दा समस्या भएको बताउँदै खत्रीले अझै काम नगरे सम्झौता रद्द गर्ने अवस्था आउने बताए ।
