माघ ११ धनगढी । अत्तरिया उद्योग वाणिज्य संघमा नयाँ मनोनित गरिएका ६ जना सदस्यलाई राखेर कुनै पनि निर्णय नगर्न उच्च अदालत दिपायलले अन्तरिम आदेश जारी गरेको छ ।
शुक्रबार उच्च अदालत दिपालयका न्यायाधीस डण्डपाणि शर्माको एकल इजलासले मनोनित गरिएका ६ जना सदस्यको उपस्थितिमा बैठक बस्ने र निर्णय गर्ने समेतका कार्य नगर्न अल्पकालिन अन्तरिम आदेश जारी गरेको हो ।
संघका केही पदाधिकारी सहित ११ जनाले राजीनामा दिए पछि अध्यक्ष कल्याण सिँ बोहराले सदस्य पदमा ६ जनालाई मनोनित गरेका थिए । अदालतले माघ २० गते सम्मका लागि अल्पकालिन अन्तरिम आदेश दिएको हो ।
अन्तरिम आदेशलाई निरन्तरता दिने वा नदिने सम्बन्धमा दुवै पक्षको छलफल सुनेर निर्णयमा पुगिने बताईएको छ । संघका केही पदाधिकारी सहितका ११ जना सदस्यहरुले राजिनामा दिए पछि संघका अध्यक्ष बोहराले यही पुस २८ गते ६ जनालाई सदस्यमा मनोनित गरेका थिए ।
उनले संघको विधान २०७१ को परिच्छेद ४ को दफा १४ को बुँदा नम्बर ५ बमोजिम रिक्त रहेका सदस्यको पद मनोनित गरेको बताएका थिए । तर मनोनित सदस्यको विषयमा उच्च अदालतमा मुद्धा परेको थियो । उक्त मुद्धामा अधिवक्ता दिपकराज जोशीले बहस गरेका थिए ।
