पौष २८ कञ्चनपुर । शुद्ध खानेपानी उपभोग गर्न पाएपछि कञ्चनपुरको शुक्लाफाँटा नगरपालिका वडा नम्बर–११ का बासिन्दा खुसी भएका छन । पाँच करोडको लागतमा कलुवापुर खानेपानी आयोजना सम्पन भएपछि शुद्ध खानेपानी उपभोग गर्न पाएका वडा नम्बर–११ का बासिन्दा भएका हुन ।
खानेपानी उपभोक्ता समितिका अध्यक्ष विनोदकुमार दमाईले शुद्ध खानेपानी उपभोग गर्न पाएपछि स्थानीय खुसी भएको बताए । उनले आयोजना अन्तर्गत दुई लाख २५ हजार लिटर क्षमताको ट्याङ्की, दुईवटा डिपट्युबेल जडान, ५० किलोमिटर पाइप लाइन विस्तार गरिएको बताए ।
अध्यक्ष दमाईले उपभोक्तालाई दैनिक चौबीसै घण्टा पानी उपलब्ध गराउने व्यवस्था गरिएको जानकारी गराए । हालसम्म पाँच सय ६५ वटा निजी र तीन वटा सार्वजनिक धारा जडान गरिएको उनले जानकारी गराए । आठ कठ्ठा क्षेत्रफलमा पक्की पर्खाल सहितको आयोजनाको कार्यालय भवन समेत निर्माण गरिएको उनले बताए ।
त्यसैगरी अतिरिक्त पानी प्रशोधनका लागि संयन्त्र निर्माण, २७ वटा भल्व च्याम्बर, एउटा मेन भल्व च्यामबर र एउटा पानी परीक्षण गर्ने मेसिन राखिएको उनले बताए । आयोजनाको रेखदेख र सञ्चालनका लागि तीन जना कर्मचारीको व्यवस्था गरिएको समेत उनले जानकारी गराए ।
त्यसैगरी समितिका कोषाध्यक्ष टेकबहादुर भण्डारीले धारा जडानका लागि दुई हजार शुःल्क लिने गरेको बताउदै १० युनिट सम्म खपत गर्ने ग्राहकबाट एक सय शुल्क लिने गरिएको बताए । उपभोक्तालाई शुद्ध खानेपानी उपलव्ध गराउन महिनाको दुई पटक ट्याङ्की सरसफाइ गर्ने व्यवस्था गरेको बताउदै उनले परीक्षण संयन्त्रबाट पानी वितरण गरिने र गुणस्तर मापन गरिने बताए ।
पानीको आपूर्तिमा बाधा आउन नदिन टुटफुट भएका ठाउँमा तत्कालै कर्मचारी खटाएर मर्मत गर्ने उनले बताए । विद्युत् अभाव भएका बेला पानी निरन्तर उपलब्ध गराउन भने कठिनाइ हुँदै आएको उनले बताए । आर्थिक अभावले सोलार तथा जेनेरेटरको व्यवस्था गर्न नसकिएकाले अनुदानमा उपलब्ध गराउने दातृ निकायको खोजी गरीरहेको उनले बताए ।
वडाको वर्तमान जनसङ्ख्या १५ हजार एक सय ३० रहेको बताउदै उनले एक हजार सात सय परिवार रहेको बताए । सबै घरपरिवारमा खानेपानी पुर्याउने लक्ष्यका साथ समितिले काम गरीरहेको उनले बताए ।
आयोजना निर्माण कार्य २०६७ साल देखि थालिएको बताउदै उनले बजेट अभाव, कोरोना महामारी लगायत कारणले निर्माणकार्य ढिलो भएको बताए । पूर्ण क्षमतका साथ सञ्चालन गर्न अझै केही समय लाग्ने उनले जानकारी गराए ।
