पौष २८ बैतडी । सामाजिक विकास कार्यालय बैतडीले दलित समुदायका युवाहरुलाई स्वदेशमै उद्यमी बनाउने उदेश्यले आरन र चोयाको तालिम दिएको छ । सामाजिक विकास कार्यालय बैतडीले बैतडीका १० वटै स्थानीय तहबाट दलित समुदायका युवाहरुलाई छनौट गरेर सातदिने तालिम दिएको हो ।
तालीम्मा सहभागी शिवनाथ गाउँपालिका वडा नम्बर–६, डाँडाकोटका मनिराम पार्कीले आरन र बाँसका चोयाको सिप सिक्न पाउँदा खुसी लागेको बताए । गत वर्ष शिवनाथ गाउँपालिकाले फोहोर व्यवस्थापन गर्न डोको किन्न थाले पछि व्यावसायिक रूपमै डोको बुन्न थालेको उनले बताए ।
उद्यमीबाट प्रतिडोको छ सय रुपैयाँका दरले किन्ने गरेको शिवनाथ गाउँपालिका अध्यक्ष कर्ण साउदले बताए । सामाजिक विकास कार्यालयले प्रशिक्षक मार्फत युवालाई आरन र बाँसका चोयाका सामग्री तयार गर्न दक्ष प्रशिक्षकद्वारा तालिम दिइएको कार्यालय प्रमुख शङ्करदत्त जोशीले बताए ।
उनले २५ जना युवालाई आरन र चोयाका सामग्री बुन्ने सिप सिकाएको बताए । सिपलाई निरन्तरता दिन औजार र सामग्री किन्न प्रदेश सरकारले तोकेको मापदण्ड अनुसार प्रतियुवा २० हजार रुपैयाँका दरले आर्थिक सहयोग समेत गरेको उनले जानकारी गराए ।
नयाँपुस्तालाई आरनमा बसालेर हँसिया, त्रिशूल लगायत कृषि औजार बनाउन सिकाएको प्रशिक्षक शङ्कर टमटाले बताए । तालिममा सहभागी भएका युवाले चासोका साथ सिप सिकेको सामाजिक विकास कार्यालयका प्राविधिक सहायक भोजबहादुर चुनाराले बताए । अधिकांश युवाले डोको बुन्न सजिलो माने पनि नाङ्लो बुन्ने सिप सिकाउन धेरै समय लागेको प्रशिक्षक जयदेव कामीले बताए ।
