पौष २८ बाजुरा । सडक शिलान्यास भएको २५ वर्षपछि बाजुराको कोल्टीमा बस पुगेको छ । २५ वर्ष पहिले शिलान्यास भएको बाजुराको मार्तडी–कोल्टी सडक खण्डबाट पहिलो पटक कोल्टीमा बस पुगेको हो ।
शुक्रबार महाकाली यातायात प्रालिद्वारा सञ्चालित तीन वटा बस कोल्टी पुगेका हुन् । दुर्गम क्षेत्र कोल्टीमा पहिलो पटक बस पुगे पछि स्थानीय खुसी भएका छन् । बुढीनन्दा नगरपालिकाका प्रमुख जनककुमार बोहराले कोल्टीमा बस पुगेपछि सर्वसाधारणले सहज रूपमा यात्रा गर्न पाउने बताए ।
कोल्टीमा बस पुगे पछि स्थानीयले बाजागाजा सहित बसका चालक सहितका कर्मचारी र यात्रुको स्वागत गरेका थिए । कोल्टीमा बस पुगे पछि बाजुराका बुढीनन्दा, हिमाली, स्वामीकार्तिक र जगन्नाथ गाउँपालिकाका बासिन्दालाई सदरमुकाम मार्तडी र अन्य जिल्ला आउन जान सहज हुने भएको छ ।
त्यसैगरी मुगु र हुम्लाका १३ वटा पालिकाका बासिन्दालाई समेत कोल्टी, मार्तडी हुँदै धनगढी, नेपालगन्ज र काठमाडौँ पुग्न सजिलो हुने भएको छ ।