पौष २६ धनगढी । कैलालीमा सम्बन्ध विच्छेदका लागी निवेदन दिने पुरुषको संख्या बढ्दै गएको छ । जिल्ला अदालत कैलालीमा सम्बन्ध विच्छेदका लागि निवेदन दिने पुरुषको सख्या बढ्दै गएको हो । कैलाली जिल्ला अदालतको तीन बर्षको तथ्याङ्क अनुसार सम्बन्ध विच्छेदका लागि मुद्धा दर्ता गर्ने पुरुषको संख्या बढ्न थालेको हो ।
मुलुकी देवानी संहिता २०७४ले पुरुषलाई पनि सम्बन्ध विच्छेदका लागि निवेदन दिन सक्ने व्यवस्था गरेदेखि सम्बन्ध विच्छेदका लागि निवेदन दिने पुरुषको संख्या निरन्तर बढ्न थालेको तथ्याङ्कले देखाएको हो ।
कैलाली जिल्ला अदालतको तथ्याङ्क अनुसार आर्थिक बर्ष २०७८÷०७९मा १ सय ७५ जना पुरुषले सम्बन्ध विच्छेदका लागि निवेदन दिएकोमा जम्मा ६ सय ७ वटा सम्बन्ध विच्छेदका निवेदन दर्ता भएका थिए ।
आर्थिक बर्ष २०७९÷८० मा ७ सय ६ वटा सम्बन्ध विच्छेदका मुद्धामा २ सय २० जना पुरुषले निवेदन दिएका थिए ।
त्यसैगरी चालु आर्थिक बर्षको पुस २१ गते सम्म कैलालीमा ७ सय ७४ वटा सम्बन्ध विच्छेदका निवेदन दर्ता भएकोमा २ सय २१ जना पुरुषले निवेदन दिएको कैलाली जिल्ला अदालतका तहशिलदार गिरिराज भण्डारीले जानकारी गराए ।