पौष २४ धनगढी । स्वास्थ्य तथा जनसङ्ख्यामन्त्री प्रदीप पौडेलले कैलालीको गेटामा प्रस्तावित शहीद दशरथचन्द विश्वविद्यालय सञ्चालनका लागि सरकारले गृहकार्य गरिरहेको बताएका छन् । बुधबारधनगढीमा आयोजित पत्रकार सम्मेलनमा मन्त्री पौडेलले नेपालका अन्य छ वटा प्रदेशमा चिकित्सा शास्त्रमा अध्यापन सुरु भइसकेको बताउदै अब सुदूरपश्चिम प्रदेशमा पनि उक्त कार्यक्रम सञ्चालन गर्ने गरी गृहकार्य भइरहेको बताएका हुन ।
विश्वविद्यालय बनाउनु अघि गेटामा तीन सय शय्याको अस्पताल सञ्चालन गर्ने र आगामी असार देखि ‘एमबिबीएस’को पढाइ थाल्ने गरी तयारी भइरहेको उनले बताए । शहीद दशरथ चन्द मेडिकल विश्वविद्यालय बनाउने सम्बन्धी विधेयक संसदीय समितिमा छलफलमा रहेकाले संसद्को आगामी अधिवेशनमा त्यसलाई प्रवेश गराइने मन्त्री पौडेलले बताए ।
उनले विश्वविद्यालय सञ्चालनका लागि भौतिक पूर्वाधारसँगै अस्पताल सञ्चालन र अध्यापन पनि सुरु गर्नुपर्ने भएकाले त्यसका लागि नीति निर्माण गर्नुपर्ने बताए । गेटामा मेडिकल विश्वविद्यालय सञ्चालन गर्न सबै दल सहमत भएको बताउदै उनले सरकार काठमाडौँ बाहिर पनि छ भन्ने पुष्टि गर्न पनि शहीद दशरथ चन्द विश्वविद्यालय स्थापना हुन आवश्यक भएको बताए ।
विश्वविद्यालय सञ्चालन पछि मात्रै अस्पताल चल्छ र एमबीबीएसको पढाइ हुन्छ भन्ने कुरा नभएको बताउँदै उनले अहिले नै अस्पताल चलाउन सकिने बताए । यसका लागि छात्रवृत्ति तर्फका १२ जना चिकित्सक र १८ जना नर्सलाई गेटामा पठाएर तत्काल अहोरात्र आकस्मिक सेवा र सघन उपचार सेवा सञ्चालन गर्न लागेको उनले बताए ।
गेटामा मेडिकल विश्वविद्यालय स्थापनामा सुदूरपश्चिम प्रदेशवासीले बढी चासो राख्दै आएका छन् । विश्वविद्यालय सञ्चालनका लागि दबाब दिन गठन भएको सङ्घर्ष समितिले पटक पटक दबाबमूलक कार्यक्रम गर्दै आएको छ । गोदावरी नगरपालिकाको गेटामा मेडिकल कलेज सञ्चालन गर्न सात अर्बको लागतमा एक वर्षअघि सुविधा सम्पन्न भवन एवं संरचना निर्माण भई सकेका छन् ।
सङ्घर्ष समिति र स्थानीयवासीको निरन्तरको दबाब पछि ती संरचनामा ५० शय्याको अस्पताल सञ्चालनमा ल्याइए पनि अस्पतालको सघन उपचार कक्ष (आइसियु), जनरल बेड र आकस्मिक कक्षबाट अपेक्षाकृत सेवा प्रवाह हुन सकेको छैन ।
