पौष २२ धनगढी । यही पुस २५ गतेदेखी टीकापुर महोत्सव हुने भएको छ । टीकापुर उद्योग वाणिज्य संघको आयोजनामा हुने महोत्सवको तयारी तिब्र पारिएको छ ।
महोत्सव भित्र जम्मा दुई सय स्टल रहने आयोजकले जनाएको छ ।
आयोजकका अनुसार पण्डाल भित्र एक सय २७ व्यापारिक स्टल रहने छन भने पण्डाल बाहिर २६ वटा होटल रहने छन् । थारु गाउँमा २४, अटोमोबाइलमा १४, मोटरसाइकल र कृषि उद्यमी गरी नौ स्टल रहने जनाइएको छ ।
वाणिज्य संघले महिला उद्यमी लगायतलाई गरी पाँच वटा स्टल निःशुल्क उपलब्ध गराएको छ । हाल सम्म ९० प्रतिशत स्टल बुक भइसकेको बताईएको छ । महोत्सवमा सर्वसाधारणका लागि १ सय रुपैया टिकट तोकिएको संघका महासचिव नवराज रिमालले जानकारी दिए ।
उनले विद्यार्थीका लागि ५० प्रतिशत छुट र एकल महिला, ज्येष्ठ नागरिक तथा अपाङ्गता भएका व्यक्तिका लागि भने निःशुल्क प्रवेशको व्यवस्था गरिएको बताए । संघले २०६५ साल देखि टीकापुरमा महोत्सव आयोजना गर्दै आएको छ ।
