पौष २२ धनगढी । जिल्ला अदालत कैलालीमा १४ जना विरुद्ध चेक अनादरमा मुद्धा दायर गरिएको छ । बैंक तथा वित्तीय कम्पनीहरुमा चेक अनादर अर्थात् चेक बाउन्सका घटना बढ्न थालेसंगै १४ जना विरुद्ध चेक अनादरमा मुद्धा दायर गरिएको हो । बैङ्किङ कसुर अन्तर्गत खातामा पर्याप्त रकम नभई पनि भुक्तानीका लागि चेक काट्ने र दिने घटना बढ्न थालेका छन ।
त्यसैगरी चेक बाउन्सका मुद्दा लिएर न्यायिक केन्द्र धाउनेहरुको संख्या पनि बढ्न थालेको छ । जिल्ला अदालत कैलालीले सोमबारका लागि चेक अनादरमा पाँच वादीले १४ जना प्रतिवादी विरुद्ध दायर गरेको मुद्दाका लागि पेसी तोकेको थियो । २०७९ असोज ३० गते चेक अनादर मुद्दामा वादी राजकुमारी चौधरीले प्रतिवादी रामशरण चौधरी सति २ जना विरुद्ध दायर गरिएको मुद्दाको सोमबार पेसी तोकिएको थियो ।
त्यस्तै राजकुमारी चौधरीले २०७९ कार्तिक २३ गते सोही मुद्दामा सुर्बनीदेवी चौधरी सहित २ जना विरुद्ध दायर गरिएको मुद्दाको पनि पेसी तोकिएको थियो । सोही वर्षको कार्तिक २५ गते राजकुमारीले थप २ जना विरुद्ध र २०७९ पौष १९ गते थप २ तथा सोही वर्षको माघ १० गते चेक अनादर विनिमय अधिकार पत्र ऐन २०३४ को दफा १०७ क अन्तर्गत राजकुमारीले रामशरण चौधरी सहित २ जना विरुद्ध दायर गरिएको मुद्दाको पेसी तोकिएको थियो ।
गत वर्षको फागुन १० गते दुगड ब्रदर्स एण्ड प्रालिले लालबहादुर विक विरुद्ध चेक अनादरमा दायर गरिएको मुद्दाको पेसी तोकिएको थियो । चेक अनादरमै भक्तबहादुर साउँदले जगत बहादुर पार्की विरुद्ध, श्याम विष्टले शान्तिदेवी चौधरी विरुद्ध र गजेन्द्रबहादुर भण्डारीले आशिष भण्डारी विरुद्ध दायर गरेको मुद्दाको पनि पेसी तोकिएको थियो ।
बैङ्किङ तथा वित्तीय व्यवस्था अनुसार विनिमय वा भुक्तानीका लागि सहज होस् भन्ने किसिमले जारी गरिएको भुक्तानी आदेशपत्र चेक हो । यस्तो आदेश पत्र खातावालाले जोकोहीको नाममा जारी गर्न सक्छ र बैङ्कले पनि प्रक्रिया मिलेको खण्डमा भुक्तानी दिन सक्छ ।
चेक बैङ्कबाट अनादर वा अस्वीकृत पनि हुन सक्छ । यदि खातावालाले काटेको चेक वित्तीय नियम वा चेकको नियम अनुसार मेल नखाएमा वा चेकमा आदेश गरे अनुसारको रकम नपुगेमा चेक अस्वीकृत हुन सक्छ । जसलाई चेक बाउन्स भनिन्छ ।
