पौष २१ दार्चुला । महाकाली लोकमार्गको खलङ्गा–गोकुलेश्वर सडक खण्ड अन्तर्गत किम्तडी भीरमा अवरुद्ध रहेको सडक ६ दिन पछि शनिबार देखि सुचारु भएको छ ।
चट्टान फुटाएर सडक चौडा बनाउने क्रममा पहिरो खसे पछि पुस १५ गते देखि अवरुद्ध भएको सडक सुचारु भएको हो ।
प्रमुख जिल्ला अधिकारी यज्ञराज जोशीले पहिरो हटाएर आवागमन सुचारु गरिएको जानकारी गराए । पहिरोका कारण खलङ्गा र किम्तडी बीचका यात्रुहरूलाई सास्ती भोग्नु परेको बताईएको छ ।
निर्माण प्रतिनिधि सुरेन्द्र बमले शनिबार सडक सुचारु गरेपछि आइतबारबाट बाँकी निर्माण कार्य अघि बढाइएको बताए ।
सवारी पास भएको बताउदै आईतबारबाट कामलाई तीव्रता दिएको उनले बताए । पहिरोका कारण मुख्य राजमार्ग अवरुद्ध हुँदा यात्रुहरूले भीर चढेर पैदल यात्रा गर्नुपरेको उनले बताए ।
जिल्ला प्रहरी कार्यालय दार्चुलाका प्रहरी निरीक्षक कान्तिराज जोशीले महेन्द्र नमूना मावि, खलङ्गाले शुक्रबार एक दिन विद्यालय बन्द गर्नुपरेको बताए ।
मालवाहक गाडीहरू किम्तडी र खलङ्गामा रोकिएको बताउदै उनले लामो दूरीका बस र स्थानीय जिप सञ्चालन हुन नसकेको बताए । शनिबार दिउँसोबाट सडक खुला भएसँगै खलङ्गा, महेन्द्रनगर, धनगढी, काठमाडौं लगायतका गन्तव्य तर्फका बस र अन्य सवारी साधन सञ्चालनमा आए पछि यात्रुहरूलाई सहज भएको उनले जानकारी गराए ।
सडक निर्माण कार्यलाई व्यवस्थित बनाउँदै लामो समय सम्म सडक अवरुद्ध नहुने निर्माण पक्षले दाबी गरेको छ ।