पौष २१ धनगढी । सुदूरपश्चिम प्रदेशका सबै सरकारी अस्पतालमा निःशुल्क रक्त सेवा सुरु भएको छ । नेपाल रेडक्रस सोसाइटी रक्त सञ्चार केन्द्रसँग सहकार्य गरेर प्रदेश सरकारले सेवा सुरु गरेको हो ।
बिरामीका आफन्त रोशन चौधरीलाई निःशुल्क रक्त प्रदान गदै मुख्यमन्त्री कमलबहादुर शाहले सेवाको उद्घाटन गरेका हुन् ।
उनले आफू दोस्रो पटक मुख्यमन्त्री हुँदै गर्दा पहिलो निर्णयमै निःशुल्क रक्त उपलब्ध गराउने निर्णयमा हस्ताक्षर गरेको बताउदै सामाजिक विकास मन्त्रालयले महत्त्वपूर्ण कार्यको थालनी गरेको बताए ।
रेडक्रस निःस्वार्थमा सेवा गर्ने संस्था रहेको र यसमा दायाँबायाँ, भ्रष्टाचार नहुने गरेकाले प्रदेश सरकारले विश्वास गरेर रेडक्रससँग सहकार्य गरेको उनले बताए ।
सहकार्य प्रदेश सरकारले अस्पतालहरूसँग पनि गर्न सक्ने बताउदै रेडक्रस अझ बढी विश्वासिलो संस्था भएकाले सरकारले रेडक्रससँग सहकार्य गरेको उनले जानकारी गराए ।
प्रदेश सरकारले सुम्पेको जिम्मेवारी प्रभावकारी रूपमा निर्वाह गर्न रेडक्रसकर्मीहरूलाई उनले आग्रह समेत गरेका छन ।
त्यसैगरी सामाजिक विकास मन्त्री मेघराज खड्काले निःशुल्क रक्त सेवाले विपन्न वर्ग लगायतका बिरामीको उपचारमा सहयोग पुग्ने विश्वास गरिएको बताए ।
प्रदेशमै सबैभन्दा बढी १ सय ७ पटक रक्तदान गर्ने दीपक उपाध्यायलाई उक्त अवसरमा रक्तदान सद्भावना दूत नियुक्त गरिएको बताईएको छ ।