मंसिर २४ बाजुरा । बाजुराको रुगीन स्वास्थ चौकीमा आगलागीबाट झण्डै २ करोडको क्षति भएको छ । बाजुराको हिमाली गाउँपालिका वडा नम्बर ५ रुगीनस्थित ढुङ्गा माटोले बनेको टिनले छाएको १ तले ६ कोठे रुगीन स्वास्थ चौकीको भवनमा आगलागी हुँदा १ करोड ८० लाख बराबरको धनमाल जलेर नष्ट भएको हो ।

उक्त स्वास्थ चौकीमा बिजुलीको तार सट भई आगलागी भएको प्रहरीले जानकारी गराएको छ । आगलागीबाट स्वास्थ्य चौकी भवन, औषधी, मेसिन, दराज, कागजपत्र लगायतका सामानहरु जलेर नष्ट भएको प्रहरीले जानकारी गराएको छ ।

उक्त आगलागी नेपाल प्रहरी, नेपाली सेना र स्थानीयको सहयोगमा नियन्त्रणमा लिइएको र आगलागी सम्बन्धमा आवश्यक अनुसन्धान भइरहेको प्रदेश प्रहरी कार्यालय धनगढीले जानकारी गराएको छ ।