मंसिर २४ बैतडी । बैतडीमा चट्याङ लागेर दुई जना घाइते भएका छन् । बैतडीको पाटन नगरपालिका वडा नम्बर ७ किम्तोलीमा चट्याङ लागेर स्थानीय २५ बर्षीया निर्मला चन्द र १२ बर्षीया अनिता भट्ट घाइते भएका हुन् ।
स्थानीय डम्मरदत्त भट्टको घर नजिकै रहेको विद्युतको पोलमा चट्याङ परेको र उक्त चट्याङ लागेर दुवै जना घाइते भएको जिल्ला प्रहरी कार्यालय बैतडीका प्रवक्ता प्रहरी निरीक्षक जनकराज ढुंगानाले जानकारी गराए ।
चट्याङ लागेर घाइते भएकी चन्दको घाँटी नजिक जलेको बताउदै उनले भट्टको पनि शरीरमा चोट रहेको जानकारी गराए । उनले घाइते दुवै जनालाई उपचारका लागि डडेल्धुरा अस्पताल लगिएको जानकारी गराए । चट्याङ लागेर स्थानीय जनक बहादुर चन्दले पालेको एक भैंसी मरेको छ भने दिपक दमाईले पालेको एक गोरु पनि मरेको छ ।
त्यस्तैगरी चट्याङले स्थानीय डम्मरदत्त भट्ट, धर्मानन्द भट्ट र जनक बहादुर चन्दको घरमा गरिएको वाइरिङ नष्ट हुनुका साथै विद्युत मिटर समेत जलेको प्रहरी निरीक्षक ढुंगानाले जानकारी गराए ।
