मंसिर १७ धनगढी । उद्योग, वाणिज्य तथा आपूर्तिमन्त्री दामोदर भण्डारीले विदेशी लगानीकर्तालाई नेपालमा लगानी गर्न आह्वान गरेका छन । भारतको राजधानी नयाँ दिल्लीमा सोमबार देखि सुरु भएको दुईदिने २९औँ साझेदारी शिखर सम्मेलनको पूर्ण सत्रमा मन्त्री भण्डारीले विदेशी लगानीकर्ताहरूलाई नेपालमा लगानी गर्न आह्वान गरेका हुन ।
सोमबार देखि भारतको वाणिज्य तथा उद्योग मन्त्रालय र भारतीय उद्योग परिसङ्घको आयोजनामा भारतको राजधानी नयाँ दिल्लीमा सुरु भएको दुईदिने २९औँ साझेदारी शिखर सम्मेलनमा मन्त्री भण्डारीले ५० करोडसम्म लगानी गर्न विदेशबाट आवेदन दिन सकिने जानकारी गराउदै विदेशी लगानीकर्ताहरूले अनलाइन प्रणाली मार्फत स्वतः पूर्वस्वीकृति प्राप्त गर्ने जानकारी गराए ।
त्यसैगरी, एफडिआईको थ्रेसहोल्ड पाँच करोडबाट घटाएर दुई करोडमा पुर्याएको र सूचना प्रविधि क्षेत्रमा लगानीको थ्रेसहोल्ड नभएको मन्त्री भण्डारीले सम्मेलनमा जानकारी दिए । उनले नेपालमा व्यापार गर्न नीतिगत र कानुनी पक्षमा सुधार गर्न ध्यान केन्द्रित गरेको बताउदै लगानीकर्तालाई दर्ता र सुविधा उपलब्ध गराउन १४ एजेन्सीलाई एउटै छानामुनि ल्याएर वन स्टप सर्भिस सेन्टर ओएसएससी स्थापना गरिएको बताए ।
मन्त्री भण्डारीले नेपालमा लगानी गर्ने विदेशी लगानीकर्ताहरूले आफ्नो लगानीको नाफा र पुँजीको ‘ग्यारेन्टी’सहित उच्च दरमा प्रतिफल प्राप्त गरिरहेको बताए । बहुपक्षीय, क्षेत्रीय र द्विपक्षीय व्यापार सम्झौतामा गरिएको प्रतिबद्धताले नेपाललाई अन्तर्राष्ट्रिय व्यापारका लागि सबैभन्दा उदार र खुला बजार बनाएको उनले बताए ।
नेपालमा नवप्रवर्तन, उद्यमशीलता र लगानीलाई प्रवद्र्धन गर्न सक्षम व्यापारिक वातावरण सिर्जना गर्न प्रतिबद्ध रहेको बताउदै मन्त्री भण्डारीले नियामक ढाँचालाई थप सुधार गर्न साझेदारहरूबाट प्रतिक्रिया र सुझावका लागि खुल्ला र्भएको बताए । मन्त्री भण्डारीले शिखर सम्मेलनमा भएको छलफल र विचार विमर्शले दिगो विकास, नवप्रवर्तन, प्रविधि हस्तान्तरण र समृद्धिलाई अगाडि बढाउन अर्थपूर्ण साझेदारीका लागि मार्ग प्रशस्त गर्नेमा विश्वास व्यक्त गरे ।
उनले आर्थिक समृद्धिको साझा लक्ष्यलाई साकार पार्न पुँजी, नयाँ प्रविधि र विशेषज्ञता ल्याई साझेदार हुन सम्भावित क्षेत्रमा अन्वेषण गर्न विश्वभरका व्यवसाय र लगानीकर्तालाई आमन्त्रित गरे । समृद्ध नेपाल, सुखी नेपाली’को राष्ट्रिय नारासहित नेपालले पर्यटन, जलविद्युत्, कृषि, औषधि र सुगन्धित वनस्पति, सूचना प्रविधि तथा उत्पादन जस्ता क्षेत्रमा लगानीका प्रशस्त अवसर प्रदान गरेको सम्मेलनमा मन्त्री भण्डारीले जानकारी गराए ।
उनले द्विपक्षीय र त्रिपक्षीय व्यवस्थाका साथ छिमेकी मुलुक भारत र बङ्गलादेशमा विद्युत् निर्यात गर्ने अवस्थामा रहेको बताए । मन्त्री भण्डारीले नेपालले भारतसँगको आफ्नो बलियो र ऐतिहासिक सम्बन्धलाई महत्व दिएको बताउदै दुई देशको साझा इतिहास, सांस्कृतिक सम्बन्ध र आर्थिक अन्तर–निर्भरतामा सम्बन्धको जरा गहिरो रुपमा गाडिएको बताए । नेपालमा पर्यटन र प्रत्यक्ष वैदेशिक लगानीका हिसाबले भारत सबैभन्दा ठूलो स्रोत देश रहेको बताए । सम्बोधन गर्नु पूर्व भारतीय समकक्षी पियुष गोयलले मन्त्री भण्डारीको स्वागत गरेका थिए ।
