मंसिर १७ बाजुरा । सुदूरपश्चिम प्रदेशको बाजुराका ६२ जनामा एचआइभी संक्रमण पुष्टि भएको छ । एचआइभी नयाँ संक्रिमत हुने दर घटेको भए पनि बाजुराका ६२ जनामा एचआइभी संक्रमण पुष्टि भएको हो । जनचेतनाको विकास, परीक्षणको सुविधा तथा औषधी सेवनको पहुँच विस्तारले संक्रिमत दर घटेको भए पनि बाजुरामा बढेको तथ्याकले देखाएको हो । सुदूरपश्चिम प्रदेशमा यस वर्ष एक लाख ११ हजार बढीमा परीक्षण गर्दा २ सय १८ जनामा एचआइभी संक्रमण पुष्टि भएको छ ।

प्रदेशका १७ वटा ठाउँबाट एचआइभी संक्रमितलाई औषधी वितरण गरिँदै आएको छ । प्रदेशभर एआरटी उपचारमा ३ हजार ७ सय २३ जना संक्रमित रहेका छन् । सुदूरपश्चिममा आर्थिक वर्ष २०८०÷८१ सम्म एचआइभी संक्रमितको अनुमानित संख्या ४ हजार २ सय ६५ रहेको छ । जसमध्ये ४ हजार ९ जनामा एचआइभी संक्रमण पत्ता लागेको छ भने उपचारको दायरमा ३ हजार ७ सय २३ जना संक्रमित मात्रै आएका छन् ।

स्वास्थ्य निर्देशनालय डोटीको तथ्याङ्कले संक्रमित मध्ये एक हजार ९ सय २० जनाको भाइरल लोड सप्रेसको अवस्था रहेको छ । तर पनि विगतका वर्षको तुलनामा नयाँ संक्रमित हुने दर घटेको निमित्त स्वास्थ्य निर्देशक डाक्टर खगेन्द्र बमले बताए । आर्थिक वर्ष २०८०÷८१ मा २ सय १८ जना नयाँ संक्रमित मध्ये पुरुष १ सय २९, महिला ८५ र एक जना यौनिक अल्ससंख्यक रहेको स्वास्थ्य निर्देशनालयले जनाएको छ ।

चालु आर्थिक वर्षमा संक्रमण पुष्टि भएकामध्ये २ सय १४ जना मात्रै नियमित उपचारमा दर्ता भएका छन् । यस वर्ष ६४ जना संक्रमितको एड्सका कारण मृत्यु भएको छ । मृत्यु हुनेमा ४० जना पुरुष, २३ जना महिला र एक जना यौनिक अल्पसंख्यक छन् । त्यसैगरी एचआइभी संक्रमितको संख्या सबैभन्दा बढी कैलालीमा देखा परेको छ । कैलालीमा एक हजार ७ सय ४५ जना संक्रमित छन् ।

कैलाली पछि दोस्रो बढी संक्रमित भएको जिल्ला अछाममा ५ सय ८४ जना संक्रमित छन भने डोटीमा ४ सय ९३ जना संक्रमित छन् । त्यसैगरी, कञ्चनपुरमा ४ सय ६० जना संक्रमित छन् । बैतडीमा १ सय २८, डडेल्धुरामा १ सय १५, बझाङमा ९१, बाजुरामा ६२ तथा सबैभन्दा कम दार्चुलामा ४५ जना संक्रमित रहेको स्वास्थ्य निर्देशनालयले जनाएको छ ।

जनचेतना र उपचारको सहज उपलब्धताले नयाँ संक्रमण हुने दर घटेको निमित्त स्वास्थ्य निर्देशक बमले बताए । त्यसैगरी एचआइभी संक्रमण हुन नदिन सबै स्वास्थ्य संस्थामा गर्भवती आमाको अनिवार्य एचआइभी परीक्षण गर्ने व्यवस्था गरिएको छ । ९ जिल्लामा २१ वटा एचआइभी जाँच तथा परामर्श सेवा केन्द्र खोलिएका छन ।

साथै ९० प्रतिशत संक्रमित जीवन बिमामा समेत दर्ता भएका छन् । सुदूरपश्चिममा एचआइभी संक्रमितहरूले जिल्ला अस्पताल र प्राथमिक स्वास्थ्य केन्द्रहरूबाट एआरटी सेवा पाउने व्यवस्था गरिएको छ । सबैभन्दा बढी संक्रमित रहेको कैलालीमा भने चार ठाउँबाट एआरटी सेवा दिने गरिएको छ । सेती प्रादेशिक अस्पताल, मालाखेती अस्पताल, टीकापुर अस्पताल र लम्कीबाट एचआइभी संक्रमितहरूले औषधी पाउने व्यवस्था गरिएको छ ।