मंसिर १७ अछाम । सुदूरपश्चिम प्रदेशको समृद्धिसँग जोडिएको सेती लोकमार्ग निर्माणको काम सुस्त गतीमा भईरहेको छ । आर्थिक वर्ष २०६५÷६६ बाट निर्माण कार्य सुरु गरिएको सेती लोकमार्ग निर्माणको काम सुस्त गतीमा भईरहेको हो । सुदूरपश्चिम प्रदेशको विकासमा फड्को मार्ने अपेक्षा गरिएको उत्तर–दक्षिण जोड्ने राष्ट्रिय गौरवको आयोजना निर्माणको काम सुस्त गतिमा भइरहेको हो ।
भारतसँग जोडिएको कैलालीको टीकापुरस्थित तीकुने नाका हुँदै बौनियाबाट डोटी, अछाम, बाजुरा, बझाङको चैनपुर हुँदै तिब्बतको ताक्लाकोट सम्म जोड्ने उक्त सडक सुस्त गतीमा भईरहेको हो । नेपाल–भारत–चीन जोड्ने बहुउपयोगी उक्त सडक निर्माण गर्न दक्षिणखण्ड र उत्तरीखण्ड गरी दुई भागमा विभाजन गरिएको छ ।
लोकमार्गको दक्षिण खण्ड अन्तर्गत अछाम तर्फको ८० किलोमिटर, बाजुरा १२ किलोमिटर, डोटी ४० किलोमिटर र कैलालीको ७२ किलोमिटर सहित दुई सय चार किलोमिटरसडक खण्ड रहेको छ । जसमध्ये अछाममा ५७ किलोमिटर र कैलालीमा ७० किलोमिटर सहित एक सय २७ किलोमिटर ट्र्याक खोलिएको आयोजनाले जानकारी गराएको छ ।
अछाम खण्डको २३ र कैलालीको दुई किलोमिटर, डोटीको ४० र बाजुराको १२ किलोमिटर ट्याक खोल्न बाँकी रहेको छ । सडक विभागले बजेट सुनिश्चित्ता नगर्दा र दक्षिणीतर्फको डोटी खण्डको ४० किमी ट्र्याक खोल्न रूख कटानको आदेश नआउदा निर्माणको काम अवरुद्ध भएको थियो । हालै मन्त्रिपरिषद्बाट रुख कटानको आदेश आए पछि चालु आर्थिक वर्षमा काम अगाडि बढाइने सेती लोकमार्ग दक्षिण खण्ड टीकापुर–लोडे–चैनपुर सडक योजना कार्यालय साँफेबगरका प्रमुख वीरेन्द्रबहादुर चन्दले जानकारी दिए ।
यस लोकमार्गमा आवश्यक केही प्रस्तावित पक्की पुलमध्ये कैलालीतर्फ एउटा पुलको निर्माण कार्य सम्पन्न भएको छ भने दुई वटा पुल निर्माणाधीन अवस्थामा रहेका छन । त्यस्तै अछामतर्फ एउटा पुलको निर्माण कार्य सम्पन्न भएको छ भने थप एउटा पुलका लागी बोलपत्र जारी गर्ने प्रक्रिया अगाडी बढाईएको छ । उत्तरी खण्ड अन्तर्गत बझाङ जिल्लामा एक सय २८ किलोमिटर सडक पर्दछ । कैलाली खण्डमा १४ किलोमिटर सडक कालोपत्रका लागि ठेक्का भइसकेको छ भने अछाम खण्डमा तीन किलोमिटर कालोपत्र भइसकेको छ ।
यस लोकमार्गको कुल लम्बाइ तीन सय ५९ किलोमिटर रहेको छ । चालु आर्थिक वर्षका लागि उत्तरी र दक्षिणी खण्ड गरी ७० करोड बजेट विनियोजन गरिएको छ । त्यसैगरी सुदूरपश्चिम प्रदेशको गौरवको आयोजनाका रूपमा रहेको सेती लोकमार्गको १ सय ४४ किलोमीटर पहिलो पटक एक टोलीले पैदलयात्रा गरेर अवलोकन गरेको छ । सडक योजना कार्यालय साँफेबगरका प्रमुख वीरेन्द्र बहादुर चन्दको टोलीले हालै साँफेबगर देखि कैलाली सम्मको एक सय ४४ किमी यात्रा गरेर सडक खण्डको वस्तुस्थित बुझेको हो । यो दूरी पार गर्न प्राविधिक टोलीले छ दिन लगाएको बताईएको छ ।
पहिलोपटक स्थलगत अवलोकन गरी दक्षिण खण्ड भित्रपर्ने सडक र पुलको अवस्थाबारे जानकारी लिइएको प्रमुख चन्दले बताए । सेती लोकमार्ग निर्माण भए सुदूरपश्चिम प्रदेशको विकासमा टेवा पुग्ने उनले बताए । यहाँको पर्यटकीय क्षेत्रमा पनि उल्लेखनीय टेवा पुग्ने बताउदै उनले यसले नेपालको चार धाम मध्येको वैद्यनाथ धाम क्षेत्र, खप्तड लगायत क्षेत्रको प्रवर्द्धन तथा सहज पहुंँचमा सहयोग पुग्ने बताए । त्यसैगरी भारतबाट मानसरोवर क्षेत्र जाने तीर्थयात्रीहरूलाई पनि सहज हुने उनले बताए ।
