कार्तिक २० बाजुरा । बाजुरामा भरुवा बन्दुक सहित तीन जनालाई प्रहरीले पक्राउ गरेको छ । गौमुल गाउँपालिका वडा नम्बर–६ का ६३ वर्षीय गोरे लुहार, बडीमालिका नगरपालिका वडा नम्बर–१ सलेनाका ३९ वर्षीय गोरख कार्की र ३७ वर्षीय बुद्ध कार्कीलाई प्रहरीले पक्राउ गरेको हो ।
उनीहरुलाई गौमुल गाउँपालिका वडा नम्बर–६ सटेडाबाट १० थान भरुवा बन्दुक र बन्दुकको ३३ थान नाल सहित मंगलबार बिहान पक्राउ गरेको प्रहरीले जानकारी गराएको हो ।
गोरेको घरमा अवैध भरूवा बन्दुकको कारोबार भइरहेको भन्ने सूचनाको आधारमा इलाका प्रहरी कार्यालय गौमुलबाट खटिएको प्रहरीले घरभित्र लुकाई राखेका बन्दुक फेला पारी गोरे तथा बन्दुक खरिद गर्न आएका गोरख र बुद्धलाई समेत पक्राउ गरिएको प्रहरीले जानकारी गराएको हो ।
जिल्ला प्रहरुी कार्यालय बाजुराले घटनाका विषयमा थप अनुसन्धान अघि बढाएको जानकारी गराएको छ ।
