कार्तिक २० अछाम । अछाममा देउसी भैलो खेलेर साढे ३ लाख रुपैया संकलन गरिएको छ । अछामको चौरपाटी गाउँपालिका वडा नम्बर– १ स्थित परिवर्तनशिल युवा क्लबले देउसी–भैलोबाट साढे तीन लाख रुपैयाँ संकलन गरेको हो ।
मटेना टोलमा गठित उक्त क्लब र देवीस्थान आधारभूत विद्यालयले संयुक्त रुपमा खेलेको देउसी–भैलोबाट ३ लाख ५२ हजार ३ सय ६५ रुपैयाँ संकलन भएको बताईएको छ । लक्ष्मी पूजाको दिन देखि संयुक्त रुपमा सुरु भएको देउसी–भैलो बाट उक्त रकम संकलन भएको क्लबले जनाएको छ ।
करिब पाँच दिनसम्म खेलिएको देउसी–भैलोबाट उक्त, रकम संकलन गरिएको हो । देउसी भैलोबाट उठेको उक्त रकमले विद्यालयका दुई जना शिक्षकलाई तलब लगायतका अन्य सेवा सुविधा दिईने आयोजकले जनाएको छ ।
क्लबले विभिन्न किसीमका कार्यक्रमहरु गरी विद्यालयलाई प्रत्यक्ष रुपमा आर्थिक लाभ हुने कार्य गरिरहेको क्लबका अध्यक्ष देव बहादुर साउँदले जानकारी दिए । उनले क्लबको सहयोगबाट विद्यालयमा निजि श्रोतबाट दुई जना शिक्षक राखिएको बताए ।
क्लबले समाजका असहाय दुःखी र पीडितहरूलाई आर्थिक सहयोग लगायतका अन्य सामाजिक कार्य पनि गर्दै आएको उनले बताए ।
