कार्तिक २० धनगढी । धनगढीका थप ५ सय ७६ पोलमा स्ट्रिप लाइट जडान हुने भएको छ । मोहनापुल–अत्तरिया ६ लेन सडक सहितका ३ सय १६ पोलमा स्ट्रिप लाइट जडान गरेको उपमहानगरपालिकाले थप ५७६ पोलमा स्ट्रिप लाइट जडान गर्ने भएको हो । धनगढी उपमहानगरपालिकाले ‘उज्यालो धनगढी’का लागि ८० लाख बजेट विनियोजन गरेको छ ।
सहर सौन्दर्यीकरण अन्तर्गत स्मार्ट स्ट्रिट लाइट जोडेको पोलमा स्ट्रिप लाइट लगाइने भएको हो । धनगढी उपमहानगरपालिकाले ‘उज्यालो धनगढी’ अभियान अन्तर्गत स्मार्ट स्ट्रिट जडान गरेका सबै पोलहरूमा स्ट्रिप लाइट जडान गर्ने भएको हो । नगरलाई सुन्दर र उज्यालो बनाउनको लागि स्ट्रिप लाइट जडान गरिने भएको धनगढी उपमहानगरपालिकाले बताएको छ ।
हाल सम्म धनगढी–अत्तरिया ६ लेन सडक र क्याम्पस चोक–जनआवाज चोक सम्मका २ सय ४० पोल र १ सय ६० ट्री–गार्डमा स्ट्रीप लाइट जडान गरिएको छ । उपमहानगरले क्षेत्रीय सहरीले निर्माण गरेको धनगढीका सबै सडकका थप ५ सय ७६ पोलमा स्ट्रिप लाइट जडान गरिने विद्युत् शाखा प्रमुख इन्जिनियर किसन कुमार शाहले बताए ।
उपमहानगरको ‘उज्यालो धनगढी’ अभियान मार्फत् रात्रिकालीन यात्रालाई सुरक्षित र सहज बनाउन तथा व्यवसाय प्रवद्र्धन गर्ने उद्देश्य रहेको उनले बताए । हाल सम्म त्रिनगर भन्सार देखि ६ लेन सडकको गोदावरी नगरपालिकाको सिमाना सम्म, हुलाकी सडक अन्तर्गत क्याम्पस चोक देखि जनआवाज चोकसम्म, धनगढी विमानस्थल चोकदेखि विमानस्थलसम्म, सहिद गेटदेखि क्याम्पस चोकसम्म, कैलाली पुलदेखि ट्राफिक चौराहसम्म, हसनपुर सडकलगायतका क्षेत्रमा सडक बत्ती जडान गरी झलमल्ल बनाइएको छ ।
यी सडकमा थप झिलिमिली बनाउन ८० लाखको लागतमा स्ट्रिप लाइट जडान हुने इन्जिनियर शाहले बताए । सहर सौन्दर्यीकरण कार्यक्रम अन्तर्गत उपमहानगरले आफ्नै खर्चमा स्ट्रिप लाइट लगाउने उनले बताए । पहिलो चरणमा चौराहा देखि कैलाली पुल र डिभोटी चोक देखि पार्क चोक सम्म ७६ पोलमा स्ट्रिप लाइट जडान गरिएको छ ।
धनगढीको प्रवेशद्वार भन्सार गेटमा फ्लड लाइट र स्ट्रिप लाइट तथा १४० ट्रि गार्डमा स्ट्रिप लाइट जडान गरिएको छ । अब जडान हुने स्ट्रिप लाइटमा पनि राष्ट्रिय झण्डामा प्रयोग हुने निलो, रातो र सेतो रंग प्रयोग गरिने छ । ८० लाख बजेटमा सहिदगेट– क्याम्पस चोक सडक, हसनपुर–जाई सडक, गुल्म–सन्तोषी टोल सडक र मालपोत सडकमा स्ट्रिप लाइट जडान गरिने इन्जिनियर शाहले बताए ।
हालसम्म नगरक्षेत्रका ३० ठाउँमा हाइमास्ट लाइट जडान गरी सञ्चालनमा ल्याइसकेको छ । १९ वटै वडाको आर्थिक चहलपहल हुने ठाउँको चोकमा हाइमास्ट लाइट राखिएको छ भने वडाको आर्थिक गतिविधि हुने क्षेत्रमा थप बत्ती जडान गरिने बताइएको छ ।
