कार्तिक २० धनगढी । सुदूरपश्चिम प्रदेशबाट तीन सय ९७ जना जुवाडेलाई प्रहरीले पक्राउ गरेको छ । कार्तिक १ गते देखि २० गते सम्म तीन सय ९७ जना जुवाडेलाई प्रहरीले पक्राउ गरेको हो । सबैभन्दा बढी कैलालीबाट एक सय ८४ जना जुवाडेलाई पक्राउ गरिएको छ । त्यसपछि कञ्चनपुरबाट एक सय ५९ जना जुवाडेलाई पक्राउ गरिएको छ ।
त्यसैगरी अछामबाट ९ जना, डडेल्धुराबाट २८ जना, डोटीबाट १२ जना र बझाङबाट पाँच जना जुवाडेलाई प्रहरीले पक्राउ गरेको हो । कैलालीबाट पक्राउ गरिएका जुवाडेहरुबाट प्रहरीले ११ लाख ९ हजार ८ सय ८ र कञ्चनपुरबाट पक्राउ गरिएका जुवाडेबाट ११ लाख ९० हजार चार सय ५२ रुपैयाँ बरामद गरिएको छ ।
त्यसैगरी अछामबाट पक्राउ गरिएका जुवाडेबाट ८६ हजार ८५ रुपैयाँ, डडेल्धुराबाट पक्राउ गरिएका जुवाडेबाट चार लाख ४१ हजार ८ सय ६९ रुपैयाँ, डोटीबाट पक्राउ गरिएका जुवाडेबाट १२ हजार ८ सय १० रुपैया र बझाङबाट पक्राउ गरिएका जुवाडेबाट ६६ हजार एक सय ३० रुपैयाँ गरेर प्रहरीले २९ लाख ७ हजार २ सय ५४ रुपैयाँ बरामद गरेको छ ।
प्रहरीका अनुसार दशै–तिहार लक्षित सुरक्षा योजना लागु भएको अवस्थामा उक्त संख्यामा जुवाडे र नगद बरामद गरिएको हो । जुवाखालबाटै पक्राउ गरिएका उनीहरुलाई प्रचलित कानून बमोजिम कारवाही समेत गरिएको प्रहरीले जानकारी गराएको छ ।
