असोज ०२ धनगढी । कैलालीको गेटा अस्पतालमा स्तनको क्यान्सर (मेमोग्राफी) जाँचसेवा सुुरु भएको छ । अस्पतालले मेमोग्राफी मेसिन जडान गरेसँगै हरेक हप्ताको सोमबार र विहीबार स्तर क्यान्सरको जाँच सेवा सुरु भएको हो । अस्पतालका निर्देशक डाक्टर विप्लव सापकोटाले हप्तामा २ दिन स्तनक्यान्सरको जाँच सेवा सुरु भएको जानकारी दिए ।
उनले कार्तिक देखि पूर्ण रुपमा सञ्चालनमा आउने बताउदै अस्पताल प्रशासनले आईसीयु जडानको काम सक्ने वित्तिकै ईमरजेन्सी वार्ड पनि सञ्चालन गर्ने र त्यसपछि अस्पतालको सबै सेवा सुचारु हुने जानकारी गराए । विरामी भर्ना लिन थालेको बताउदै उनले अहिलेसम्म भर्ना कोही नभएको उनले बताए ।
ईन्डोर वार्डमा स्वास्थ्यकर्मीको ड्युटी खटाई सकेको बताउदै निर्देशक सापकोटाले गेटा अस्पतालमा ओपिडिका साथै भिडियो एक्सरे, एक्सरे, ईन्डोस्कोपी, फिजियोथेरापी, प्रयोगशाला र फार्मेसी सेवा सुचारु भईसकेको जानकारी गराए । प्रयोगशाला र फार्मेसी सेवा चौबिसै घण्टा सुरु भएको अस्पतालले जनाएको छ ।
विरामी भर्ना हुनका लागि ईमरजेन्सी सेवा प्रमुख भएको बताउदै उनले ईमरजेन्सीमा आएको ब्यक्तिलाई आईसीयुमा राख्नुपर्ने अवस्था आएमा, आईसीयु सेटअप भई नसकेकाले ईमरजेन्सी सेवा सुचारु गर्न नसकिएको बताए । ‘ईमरजेन्सी वार्ड तयार भएको बताउदै उनले ईमरेजेन्सी नजिकै अध्याधुनीक अप्रेशन थिएटर पनि सेटअप भईसकेको जानकारी गराए ।
स्विकृत १ सय ४१ जनाको दरबन्दीमा अहिले ७१ जना मात्रै कार्यरत भएको जानकारी गराउदै उनले त्यसमा पनि स्थाई स्वास्थ्यकर्मी र कर्मचारीको संख्या २३ जना मात्रै रहेको जानकारी गराए ।
खानेपानीको ट्याकी बनेपनि नयाँ निर्माण भएका चिकित्सक आवासहरुमा पानी आपुर्ती नभएकाले चिकित्सकहरु आउन नमानेको बताउदै उनले अझ अरु अस्पतालमा अतिरिक्त भत्ता खाईरहेका चिकित्सकहरु गेटामा सरकारी तलब मात्रै भएकाले सेवा सञ्चालनमा ढिलाई भईरहेको बताए ।
