असोज ०१ बैतडी । सुदूरपश्चिम प्रदेशको पहाडी जिल्ला बैतडीमा डेंगुको जोखिम बढेको छ । पाटन नगरपालिका वडा नम्बर–५ वसन्तपुर गाउँका नौ जनामा डेङगु संक्रमण पुष्टि भएको स्वास्थ्य कार्यालय बैतडीका सूचना अधिकारी विपीन लेखकले जानकारी दिए । आइतबार मात्रै एकै गाउँका चार जनामा डेंगु संक्रमण पुष्टि भए पछि स्वास्थ्यकर्मीहरुको टोली गाउँमै पुगेको उनले बताए ।
सोमबार ज्वरोका शंकास्पद सात जना बिरामीको रगत चेकजाँच गर्दा थप पाँच जनामा डेंगु संक्रमण पुष्टि भएको उनले जानकारी गराए । एकै गाउँका चार जनामा आइतबार मात्रै संक्रमण पुष्टि भएपछि सोमबार पाँच जना स्वास्थ्यकर्मीको टोली गाउँमै पुगेर शंकास्पद बिरामीहरुको रगत परीक्षण गरेको हो । स्वास्थ्यकर्मीको टोलीले लामखुट्टेको लार्भा खोज र नष्ट गर अभियान अन्तर्गत सरसफाइ समेत गरेको सूचना अधिकारी लेखकले बताए ।
भरेर राखेका पानीका ड्रम, पानी जमेका खाल्डा खुल्डीमा लामखुट्टेको वृद्धि विकास हुने भएकाले सरसफाइमा ध्यान दिन स्थानीयलाई सुझाव दिइएको छ । स्थानीय नागरिकहरुलाई एकै ठाउँमा जमा गरेर डेंगु रोग र यसबाट बच्ने उपायका बारेमा जानकारी दिइएको बताईएको छ । एडीस जातको पोथी लामखुट्टेको टोकाइबाट मानिसमा डेंगु सर्ने गर्दछ । डेंगु रोगको संक्रमणबाट बच्नका लागि लामखुट्टेको टोकाइबाट बच्नुपर्ने स्वास्थ्यकर्मीहरुले बताएका छन ।
डेंगु संक्रमण भएमा मानिसलाई कडा खालको ज्वरो आउने, टाउको दुख्ने, शरीरका जोर्नी तथा मांसपेशी दुख्ने, खाना खान मन नलाग्ने जस्ता लक्षण देखिने गर्दछन । यसका साथै नाक, गिजा र पेटबाट रगत बग्ने जस्ता कडा खालका लक्षण समेत देखा पर्दछन् । यस्ता खालका लक्षण देखिएमा डेंगुको जाँच गर्नु आवश्यक रहेको स्वास्थ्यकर्मीहरुले बताएका छन् ।
डेंगुको जाँच नगरीकनै जथाभावी औषधि सेवन गर्दा अन्य समस्या समेत निम्तिने भएकाले यस तर्फ सबै नागरिक सचेत हुनुपर्ने बताइएको छ । बैतडीका गाउँगाउँमा ज्वरोका बिरामीहरु बढदै गएका छन । ज्वरोका बिरामीहरुमा डेंगु समेत हुन सक्ने भएकाले नजिकको स्वास्थ्य संस्थामा गएर चेकजाँच गर्न समेत स्वास्थ्यकर्मीहरुले सुझाव दिएका छन् ।
