भदौ ३० बैतडी । बैतडीमा रोजगारीका लागि भारत गएका आप्रवासी कामदारको एचआइभी परीक्षण गरिने भएको छ । एचआइभी रोकथामको क्षेत्रमा काम गर्दै आएको संस्था बहुउद्देश्यीय विकास समाज डडेल्धुरा (एमपीडिएस)ले आप्रवासी कामदारहरुको एचआइभी परीक्षण गर्ने भएको हो ।
बैतडीबाट रोजगारीका लागि भारत गएर फर्केका आप्रवासी कामदार र उनीहरुका परिवारका सदस्यहरुको एचआइभी परीक्षण गरिने कार्यक्रम संयोजक लोकेन्द्र पन्तले जानकारी दिए । ग्लोबल फण्डको आर्थिक सहयोग, सेभ द चिल्ड्रेनको प्राविधिक सहयोगमा एमपीडीएसले सञ्चालन गरिरहेको एचआइभी रोकथाम कार्यक्रम अन्तर्गत उनीहरुको परीक्षण गरिने कार्यक्रम संयोजक पन्तले बताए ।
बैतडीका १० वटै स्थानीय तहमा ३ हजार ४ सय ५० जना आप्रवासी कामदार र उनीहरुका परिवारका सदस्यहरुको एचआइभी परीक्षण गर्ने लक्ष्य रहेको कार्यक्रम संयोजक पन्तले बताए ।
आगामी जनवरी २०२५ सम्ममा एचआइभी परीक्षणको कार्य गरिने उनले बताए । पञ्चेश्वर गाउँपालिका, शिवनाथ गाउँपालिका, मेलौली नगरपालिका, सुर्नया गाउँपालिका र दोगडाकेदार गाउँपालिकामा घरदैलो अभियान सञ्चालन गरेर एचआइभी परीक्षणको कार्य गरिने बताउदै उनले बाँकी स्थानीय तहहरुमा मोबाइल क्याम्पको आयोजना गरेर एचआइभी परीक्षणको कार्य गरिने बताए ।
भारतमा रोजगारीका लागि गएका आप्रवासी कामदार र उनीहरुका परिवारलाई एचआइभी, मलेरिया, क्षयरोग र कोभीडका बिषयमा जानकारी दिनुकासाथै ती रोगहरुको परीक्षण गरिने उनले बताए । असुरक्षित यौन सम्पर्कबाट सर्ने एचआइभीका बिषयमा ज्ञान नहुँदा धेरै बिरामीहरु समाजमा लुकेर रहेको हुन सक्ने भएकाले एचआइभी संक्रमितहरुलाई उपचारको दायरामा ल्याउन एचआइभी परीक्षण गर्ने तयारी भएको उनले बताए ।
बैतडीमा अहिले १ सय २६ जना एचआइभी संक्रमितहरु उपचारमा रहेको बताउदै उनले उनीहरुले नियमित रुपमा एआरटी औषधी सेवन गरिरहेको जानकारी गराए ।
