भदौ २९ धनगढी । बिहीबार देखिको लगातारको वर्षाले कैलालीको गोदावरीमा ४ वटा घर भत्किएका छन् । शुक्रबार लगातारको वर्षाले गोदावरी नगरपालिका वडा नम्बर– १ र ११ मा ४ वटा घर भत्किएका हुन ।
लगातारको वर्षाका कारण गोदावरी नगरपालिका वडा नम्बर– १ वसन्तपुरको आदर्श टोलकी कलावती भट्टको घर भत्किएको वडा सदस्य गम्बिर साउँदले बताएका छन् ।
घर भत्किएपछि उनलाई सुरक्षित स्थानमा सारिएको उनले बताए । त्यस्तै लगातारको वर्षाले गोदावरी नगरपालिका वडा नम्बर– ११ गणेश मन्दिरमा रहेको नवराज पनेरुको घर भत्किएको छ ।
टिन र ढुङ्गाले बनेको कच्ची घरको दिवाल भत्किए पछि उनलाई आफन्त लाल मणी पनेरुको घरमा सारिएको जिल्ला प्रशासन कार्यालय कैलालीले जनाएको छ ।
त्यस्तै वडा नम्बर ११ गणेश टोलका देवराज ढोली र जोगी दमाइको घर पनि लगातारको वर्षाले भत्किएको छ । घर भत्किए पछि देवराजको परिवारलाई आफन्त राधिका ढोली र जोगीको परिवारलाई आफन्त मधुरा दमाइको घरमा सारिएको प्रशासनले जनाएको छ ।
