भदौ २७ धनगढी । सहिद दशरथ चन्द राष्ट्रिय स्वास्थ्य विज्ञान विश्वविद्यालय संघर्ष समितिले धनगढी विमानस्थलको गेटमा होर्डिङ बोर्ड टाँसर सरकार र नेताहरुलाई ५ बुँदे आग्रह गरेको छ । संघर्ष समितिले विभिन्न ५ बुँदे माग राख्दै एयरपोर्टको गेटको दुवैपट्टि होर्डिङ बोर्ड टाँसेर आग्रह गरेको हो ।
होर्डिङ बोर्डमा सहिद दशरथ चन्द राष्ट्रिय स्वास्थ्य विज्ञान विश्व विद्यालय विधेयक चालु संसद् अधिवेशनबाट पारित गर, ६ सय शय्याको अस्पतालका लागि बनेका संरचनामा तत्काल ३ सय शय्याको अस्पताल सञ्चालन गर, सुदूरपश्चिम प्रदेशमै मेडिकल पढाई कहिले पढ्न पाउने लगायतका माग लेखिएका छन् ।
त्यसैगरी तत्काल गेटामा मेडिकल पढाई हुने व्यवस्था गर, देशका ६ वटा प्रदेशमा २५ वटा भन्दा बढी मेडिकल कलेज, प्रतिष्ठान हुँदा सुदूरपश्चिम प्रदेशमा एउटा पनि नहुनुको दोष कसलाई दिने भनेर प्रश्न पनि गरिएको छ । संघर्ष समितिका संयोजक लोक राज पाण्डे (आगो) ले सुदूरपश्चिम प्रदेशमा सहिद दशरथ चन्द राष्ट्रिय स्वास्थ्य विज्ञान विश्वविद्यालय स्थापनाका लागि भइरहेको आन्दोलनका कार्यक्रम अन्तरत एयरपोर्टको गेटमा बोर्ड लगाइएको बताए ।
उनले सुदूरपश्चिमबाट प्रधानमन्त्री, मन्त्री भएकाहरुबाटै बेवास्ता गरिएको बताए ।‘के सुदूरपश्चिमबाट कोही प्रधानमन्त्री भएको छैन ? के सुदूरपश्चिमबाट कोही मन्त्री भएको छैन ? यहाँबाट सांसद छैनन भनेर प्रश्न गर्नको लागि बोर्ड टासेको उनले बताए । एउटै भनाइ गेटामा तत्काल ३ सय शय्याको अस्पताल सञ्चालन गरिनु पर्छ भन्ने रहेको बताउदै उनले मेडिकल शिक्षा पढाई हुनुपने बताए । उनले विश्वविद्यालयको विधेयक पारित हुनुर्पर्ने पनि बताए ।
