भदौ २७ कञ्चनपुर । पश्चिमी नाका गड्डाचौकीमा सावधानी नअपनाउँदा एमपक्स सङ्क्रमणको जोखिम बढेको छ । भारतमा हालै एक जनामा एमपक्स सङ्क्रमण पुष्टि भएपनि अझै नाकामा सावधानी नअपनाउदा जोखिम बढेको हो । भारतबाट गड्डाचौकी नाका भएर दैनिक तीन सयको हाराहारीमा मानिस स्वदेश फर्किंने गरेका भए पनि सामान्य जाँच पनि नहुँदा सङ्क्रमणको जोखिम बढेको हो ।
गड्डाचौकीस्थित ‘हेल्थ डेस्क’मा भारतबाट फर्किनेमा कोरोना, डेङ्गु, एचआइभी लगायत रोग जाँच गर्ने गरिएको भए पनि उपकरण अभावमा एमपक्सको जाँच हालसम्म सुरुआत गर्न नसकिएको हेल्थ डेस्कमा कार्यरत ल्याब टेक्निसियन लक्ष्मी रिमाल धामीले बताईन । एमपक्स सम्बन्धी कुनै तालिम पनि नपाएको बताउदै उनले उपकरण पनि नभएको बताईन ।
नेटमा हेरेर थाहा पाएको लक्षण मिल्दा मानिस आएमा निगरानी राख्ने गरेको बताउदै उनले लक्षण, हाउभाउ हेरेर स्क्रिनिङ मात्रै गर्ने गरिएको बताईन । शङ्कास्पद लक्षण देखिए अस्पताल रेफर गर्ने गरिएको बताउदै उनले हालसम्म शङ्कास्पद लक्षण देखिएका सात जनालाई रेफर गरिएको बताईन । भारतको विभिन्न ठाउँबाट दैनिक भित्रिने करिब अढाइ सय मानिसको स्क्रिनिङ भइरहेको समेत उनले बताईन ।
पैदल हिँडेर आउने मानिस स्क्रिनिङ पर्ने भए पनि सवारीसाधनबाट आउने मानिसको स्क्रिनिङ गर्न नसकिएको ल्याब टेक्निसियन धामी ले बताईन । गाडीमा आउनेहरू नाकामा नरोकि सिधै जाने गरेकाले स्क्रिनिङ नसकिएको उनले बताईन । गड्डाचौकी नाका भएर महेन्द्रनगर देखि दिल्ली र देहरादुन सम्म मैत्री बससेवा पनि सञ्चालनमा रहेको बताउदै उनले करिब एक दर्जन बसमा आउने यात्रुहरु पनि जाँच नगरिकनै भित्रिने गरेको बताइन ।
कतिपय यात्रु तेस्रो मुलुकबाट दिल्ली विमानस्थल हुँदै पनि आउने गरेका कारण सङ्क्रमणको जोखिम बढेको उनले बताइन । स्वास्थ्य कार्यालय कञ्चनपुरका वरिष्ठ जनस्वास्थ्य अधिकृत ओमप्रकाश जोशीका अनुसार सरकारले नाकामा स्क्रिनिङ गर्नका लागि पत्राचार गरेको छ । “एमपक्स जाँचका लागि किट उपलब्ध नभएकाले स्क्रिनिङ गर्ने भन्ने परिपत्र आएको उनले बताए । त्यही अनुसार गरिरहेको बताउदै उनले स्क्रिनिङमा शङ्कास्पद देखिएकालाई अस्पताल जान भनेर काउन्सिलिङ गर्ने गरेको बताए ।
