भदौ २७ बाजुरा । बाजुराको खप्तड छेडेदह गाउँपालिकाका अधिकाशं गाउँ बस्तीमा गाडी सञ्चालन गर्न निर्माण गरेका ग्रामिण सडकमा हिंड्नै सकस हुने गरेको छ । हिउँदको महिना जथाभावि निर्माण गरिएका ती सडकमा बर्खाको समय लगातार पहिरो बग्न थालेपछि स्थानीयलाई सडकमा हिड्नै सकस हुने गरेको हो ।
हिउँदको महिना खनेका सडकमा बर्खाको समय पहिरो बग्ने गरेकोले बालबालिकालाई समेत विद्यालयमा आउजाउमा समस्या हुने गरेको खप्तड छेडेदह गाउँपालिका वडा नम्बर–२ पीपलगाउँका स्थानीय पदम बुढाले बताए । उनले गत साउनमा परेको अविरल वर्षातका कारण पीपल गाउँदेखि कुर्पे मथर्पुसम्म जाने सडकमा पहिरो गएपछि बालबालिकालाई विद्यालय जादा सकस हुने गरेको हो ।
भत्किएका सडकलाई समयमै मर्मत सम्भार नगर्ने हो भने हिउँदको महिनामा पनि स्थानीयलाई सडकमा आउजाउ गर्न निकै समस्या हुने बुढाले बताए । खप्तड छेडेदह गाउँपालिका पीपल गाउँ गाँज्रा कुर्पे लगायतका अधिकांश सडक बर्खाको समय पहिरो गएर अवरुद्ध भएका छन् । लगातार पानी पर्दै गएकोले अहिले सम्म सडकको मर्मत सम्भार कार्य रोकिएको छ ।
सडक मर्मत सम्भारको काम रोकिए पछि स्थानीयलाई वडा कार्यालय तथा बालकालिकालाई विद्यालय आउन समस्या भएको छ ।
सडकमा गएको पहिरोले गाउँ बस्तीमा समेत जोखिम बढेको छ । गाउँ बस्तीको माथिबाट खनेको सडकमा पहिरो जान थालेपछि त्यसले पूरै गाउँ बस्तीलाई थप जोखिममा पार्ने गरेको हो । गत असार देखि गाउँमा पुगेको सडक पहिरोका कारण अवरुद्ध भएकोले सडक मर्मत गर्ने तयारी भइरहेको खप्तड छेडेदह गाउँपालिका वडा नम्बर–२ का अध्यक्ष भक्त बुढाले बताए ।
उनले गाउँ कार्यपालिकाको बैठममा सडक मर्मत सम्भार गर्ने भन्ने निर्णय भएको बताए । यसका लागि प्राविधिकको टोली पनि सर्भे गर्नका लागि प्रत्येक वडमा पुगेको बताए । उनीहरुले सर्भे गरेको रिपोट फेरि गाउँपालिकामा पुगेपछि अवरुद्ध भएका सडक मर्मत सम्भार गरिने बुढाले बताए ।
