भदौ २६ धनगढी । शैक्षिक गुणस्तर सुधार्न नवजीवन सहकारी संस्था लिमिटेडले सहयोग गरेको छ । धनगढी उपमहानगरपालिकाको नगर प्रमुख शैक्षिक सुधार कोषमा सहकारीले आर्थिक सहयोग गरेको हो ।
विपन्न परिवारका बालबालिकाहरुको लागि विद्यालय पोषाक तथा पाठ्य सामग्री खरिदका लागि भनेर सहकारीले बुधबार२ लाख रुपैयाँ धनगढी नगर प्रमुख शैक्षिक सुधार कोषमा आर्थिक सहयोग गरेको जानकारी गराएको हो ।
धनगढी नगर प्रमुख शैक्षिक सुधार कोषमा शैक्षिक गुणस्तर सुधार कार्यक्रम सञ्चालनका लागि छनौट भएका नमुना विद्यालयका बालबालिकाका लागि पोषाक तथा पाठ्य सामग्री खरिद गर्न सहयोग गरेको नवजीवन सहकारी संस्था लिमिटेडका अध्यक्ष देब बहादुर बमले जानकारी गराए ।
धनगढी उपमहानगरले ग्रामीण क्षेत्रका विद्यालयलाई छनौट गरी नमुना विद्यालय बनाउन पहल थालेको र ती विद्यालयमा अध्ययनरत छात्रछात्राहरु आर्थिक अभावका कारण ड्रप आउट हुन नपरोस् भनेर नगर प्रमुख शैक्षिक सुधार कोष स्थापना गरिएको बताइएको छ । कोषमा विभिन्न संघसंस्थाले सहयोग गर्नेहरूको संख्या बढ्दै गएको धनगढी उपमहानगरपालिकाले जनाएको छ ।
