भदौ २४ धनगढी । डोटीको दीपायल सिलगढी नगरपालिका वडा नम्बर–६, सिलगढीका ७५ वर्षीय कालुसिंह विष्टको हत्यागरी ढोकामा ताल्चा लगाएर भागेका सरोबर श्रेष्ठलाई प्रहरीले पक्राउ गरेको छ । प्रहरीले उनकै घरभित्र वृद्धको हत्या गरिएको अवस्थामा भेटाए पछि खोजतलाश गर्दै जादा दीपायल सिलगढी नगरपालीका वडा नम्बर–६ सिलगढी बस्ने २२ वर्षीय सरोबर श्रेष्ठलाई पक्राउ गरेको हो ।
परिवारका सदस्यहरूले बिहीबार बिहान विष्ट हराएको भन्दै प्रहरी कार्यालयमा दिएको जाहेरीका आधारमा प्रहरीले खोजतलास गर्ने क्रममा कालुसिंह विष्टको हत्यागरी उनी बस्ने घरकै कोठा भित्रै बाहिरबाट ढोकामा ताल्चा लगाएर भागेका श्रेष्ठलाई पक्राउ गरी आवश्यक अनुसन्धान भइरहेको प्रहरी नायव उपरिक्षक भट्टराईले जानकारी गराए ।
जिल्ला प्रहरी कार्यालय डोटीका प्रहरी नायव उपरिक्षक भीमलाल भट्टराईले शव सड्न लागेको अवस्थामा भेटिएको जानकारी गराए । हत्यामा संलग्न भएको आरोपमा पक्राउ गरिएका दीपायल सिलगढी नगरपालीका वडा नम्बर–६ सिलगढी बस्ने २२ वर्षीय सरोबर श्रेष्ठले हत्या गरेको स्वीकारेको प्रहरीले जनाएको छ । मृतक विष्टको आइतबार अन्त्येष्टि गरिएको छ ।
