भदौ २३ धनगढी । कैलालीको धनगढीमा खुँडा प्रहारबाट २ जना घाइते भएका छन् । खुँडा प्रहारबाट इन्धन बोक्ने ना ६ ख ९४०६ नम्बरको ट्याङ्कर चालक डडेल्धुराको गन्यापधुराका हरेन्द्र देउवा र कैलालीको गोदावरी नगरपालिका वडा नम्बर– ४ का सह–चालक अनिल देउवा घाइते भएका हुन् ।
घाइते दुवै जनाको धनगढीको माया मेट्रो अस्पतालमा उपचार भइरहेको बताईएको छ । जिल्ला प्रहरी कार्यालय कैलालीका अनुसार ट्याङ्कर पार्किङको विषयमा दुई पक्षबिच विवाद हुँदा आक्रमण भएको थियो । प्रहरीका अनुसार घटनामा संलग्न ३ जनालाई पक्राउ गरिएको छ ।
डोटीको जोरायल गाउँपालिका वडा नम्बर – १ का १८ वर्षीय विक्रम मल्ल, दिपायल सिलगढी नगरपालिका वडा नम्बर– ३ का १९ वर्षीय अरुण बोगटी र धनगढी उपमहानगरपालिका वडा नम्बर– २ का १६ वर्षीय डोरेमन भन्ने पुष्कर धामीलाई प्रहरीले पक्राउ गरेको हो ।
घटनामा संलग्न धनगढी उपमहानगरपालिका वडा नम्बर– २ सन्तोषी टोलका २३ वर्षीय मुस्कान सिंह फरार रहेको प्रहरीले जनाएको छ । शनिवार राती साढे ११ बजे मोटरसाइकलमा आएका उनीहरूले धनगढी उपमहानगरपालिका वडा नम्बर– २ रोड हाउस क्याफे नजिक पार्किङ गरी राखिएका ट्याङ्करमा तोडफोड गर्दै चालक सहचालक माथि कुटपिट गरेको बताईएको छ । तोडफोडबाट ५ वटा ट्याङ्करमा क्षति पुगेको प्रहरीले जानकारी गराएको छ ।
