भदौ २२ धनगढी । कैलालीका प्रमुख प्रहरी उपरीक्षक पदमबहादुर बिष्टले इलाका प्रहरी कार्यालय र प्रहरी चौकीको निरीक्षण गरेका छन् । एसपी बिष्टले शुक्रबार प्रहरी महानिरीक्षक आईजीपी बसन्तबहादुर कुँवरले स्थलगत निरीक्षण गर्न लागेको टीकापुरमा रहेको प्रहरी चौकी सत्ती सहितका केही कार्यालयको निरीक्षण गरेका हुन् । बिष्टले इलाका प्रहरी कार्यालय भजनी र इलाका प्रहरी कार्यालय पृथ्वीपुरको समेत निरीक्षण गरेका हुन् ।
प्रहरी चौकी र इलाका प्रहरी कार्यालय निरीक्षण गर्दै एसपी बिष्टले लागुऔषध दुर्व्यशनी, चोरी तस्करी नियन्त्रण तथा अन्य सामाजिक अपराध नियन्त्रणमा विशेष ध्यान दिएर काम गर्न निर्देशन दिएका छन् । उनले कसैको दबाब र प्रभावमा नपर्न आग्रह गर्दै कुशलतापूर्वक जिम्मेवारी निर्वाह गर्न समेत प्रहरी अधिकृत तथा कर्मचारीलाई निर्देशन दिएका हुन । ‘थोरै जनशक्तिमा धेरै र राम्रो काम गरेर परिणाम देखाउनुपर्ने चुनौती रहेको बिष्टले बताए ।
‘चोरी, तस्करी नियन्त्रण, लागुऔषध दुव्र्यशनी एवंम् समाजमा भइरपरी आउने अन्य अपराधिक गतिविधी नियन्त्रण गर्ने प्रहरीको मुख्य दायित्व भएको बताउदै उनले सबैले आ–आफ्नो ठाउँबाट कुशलतापूर्व जिम्मेवारी निभाउनु पर्ने बताए । उनले चोरी, तस्करी तथा अपराधिक क्रियाकलाप नियन्त्रण गर्न खरो रुपमा काम गर्न समेत निर्देशन दिए ।
बिष्टले आफ्नो क्षेत्रमा शान्ति, सुरक्षा कायम गर्न र आम नागरिकलाई सुरक्षाको प्रत्याभूती गराउन राम्रो काम गर्ने कुरामा आदेश नपर्खिन सुझाव दिए । स्थलगत निरीक्षणका क्रममा प्रहरी कार्यालयले जनशक्तिको अभावमा कार्यसम्पादनमा भोग्नुपरेका समस्या र चुनौतीका विषयमा समेत प्रहरी उपरीक्षक बिष्टलाई जानकारी गराएका थिए ।
