भदौ २० धनगढी । नेपाली कांग्रेसका केन्द्रीय सदस्य तथा गृहमन्त्री रमेश लेखकले सहमतिकै आधारमा संविधान संशोधन हुने बताउदै अपब्याख्या नगर्न आग्रह गरेका छन । नेपाली कांग्रेस कैलालीले पार्टी कार्यालयमा आयोजना गरेको भेटघाट तथा अन्तरक्रिया कार्यक्रममा गृहमन्त्री लेखकले संविधान निर्माण गर्दा भएको सहमति जस्तै संविधान संशोधनमा पनि हुने बताए । ‘संविधान निर्माण गर्दा प्रमुख राजनैतिक दलहरूसँग सहमति गरेको बताउदै उनले सहमति गरेर संविधान संशोधन गर्ने बताउदै अहिले संविधान संशोधनको विषयलाई अपव्याख्या गर्न आवश्यक नभएको बताए ।
संविधान संशोधन गर्दा आधारभूत तत्त्वलाई थप बलियो बनाइने बताउदै गृहमन्त्री लेखकले संविधान संशोधन गर्दा आधारभूत तत्त्वहरू संघीय लोकतान्त्रिक गणतान्त्रिक शासन व्यवस्था ,विधिको व्यवस्था, आवधिक निर्वाचन, पूर्ण प्रेस स्वतन्त्रता, मानव अधिकार र समावेशी चरित्रको राज्य व्यवस्थालाई बलियो बनाउनको लागि संविधान संशोधन गर्ने बताए । गृह मन्त्री लेखकले यस विषयमा अनावश्यक टिका टिप्पणी गर्नुपर्ने आवश्यकता नभएको बताउदै संसदका दुई ठुला र प्रतिस्पर्धी दलहरू मिलेर सरकार बनाउने कुरा विरलै देखिने गरेको बताए ।
संसदका दुई ठुला र प्रतिस्पर्धी दलहरू मिलेर सरकार बनाउदा देशमा केही सुधारको सङ्केत देखिएको बताउदै उनले स्थिर समीकरण र स्थिर सरकार गठनको लागि ठुला दुई दलको समीकरण तयार भएको बताए । ‘दिगो सान्ती, सुशासन, विकास र संवृद्धिको लक्ष्य सहित नयाँ समीकरण बनाइएको बताउदै उनले समय सापेक्ष ढंगले संविधान संशोधन गर्ने बताए । १० वर्षको सशस्त्र द्वन्द्वका सबै घटनाहरू अन्वेषण गर्ने, सत्यको खोजी गर्ने, न्याय गर्ने र दोस्रो पटक यस्ता द्वन्द्व नहुने सुनिश्चितता गर्ने उद्देश्य रहेको समेत उनले बताए ।
ठुला दुई दल मिल्दा शान्ति प्रक्रियाका बाकी काम पनि टुङ्गोमा पुग्न लागेको उनले बताए । आम जनतामा सकारात्मक सन्देश गएको बताउदै उनले अहिले कानुन पारित गर्ने बित्तिकै अन्तर्राष्ट्रिय देश र महत्त्वपूर्ण ९ वटा संघ संस्थाले समर्थन गरेको बताए । उनले दुई ठुला दल मिलेर बनेको समीकरणको पूर्ण पालना हुने र सहमतिहरू इमानदारिता पूर्वक कार्यान्वयन हुने विश्वास व्यक्त गर्दै एमालेसँग समीकरण बनाउँदै गर्दा प्रतिस्पर्धाको दृष्टिकोणले पनि हेर्न नेता कार्यकर्ताहरूलाई सुझाव दिए । ‘हामी संयुक्त रूपले समीकरण बनाएर जाँदै गर्दा सँगसँगै प्रतिस्पर्धा पनि दिमागमा छ ।
प्रतिस्पर्धा पनि छ र समीकरण बनाएर अगाडी बढिरहेको यो अवस्थामा अत्यन्त सुझबुझका रुपमा अगाडी बढ्न जरुरी छ ’ उनले भने । त्यसैगरी गेटा मेडिकल कलेजको कानुन अन्तिम चरणमा रहेको र कानुन लागु गरेर गेटा मेडिकल कलेजलाई अगाडी बढाउने गृहमन्त्री लेखकले बताए ।
कैलालीमा आवश्यक स्थानमा प्रहरी चौकी निर्माण गर्ने, भन्सार क्षेत्रमा नागरिकमाथि हुने सास्ती कम गर्न सिमा सुरक्षा जाँचको विषय अगाडी बढाउने र राष्ट्रिय परिचय पत्र प्राप्तिमा हुने सास्ती समेत कम गर्ने आश्वासन दिएका थिए । गृहमन्त्री लेखकलाई कांग्रेस कैलाली सचिव नृप सुनारले जिल्लाको आवश्यकताको विषयमा जानकारी गराएका थिए । उनले जिल्लाका विभिन्न स्थानीय तहमा प्रहरी बिटहरू स्थापना गर्न,स्थापना भएकाहरूमा संरचना बनाउन र केही प्रहरी कार्यालयहरूको स्तरोन्नति गर्न माग गरेका थिए ।
