भदौ २० अछाम । अछामको मेल्लेख गाउँपालिकाको कार्यालय परिसरमा एक जना युवक कुटिएका छन् । मेल्लेख गाउँपालिका वडा नम्बर–५ खिमाडाका गोकुल बोहरा र गौतम साउँदले सोमवार राति मदिरा सेवन गरेर पत्रकार लाल चदारालाई कुटपिट गरेका हुन् ।
उनीहरूले मदिराको तालमा गाउँपालिका कार्यालयको ढोकामा समेत लात्तीले हानेको बताईएको छ । स्थानीय पत्रकार लाल चदारालाई दुई जना युवाले गालीगलौज गर्दे लछारपछार र कुटपिट गरेको बताइृउको छ । मदिरा सेवन गर्न आवश्यक रकम माग्ने र नदिनेलाई गालीगलौज र कुटपिट गर्ने गरेको प्रहरीले बताएको छ । पीडित लाल चदाराले प्रहरीमा उजुरी नदिएको प्रहरीले जनाएको छ ।
मेल्लेख गाउँपालिकाका उपाध्यक्ष नृपबहादुर खड्काकी श्रीमतीलाई उनीहरूले गालीगलौज गरेपछि प्रहरीलाई खबर गरिएको प्रहरीले जानकारी गराएको छ । उनीहरू दुबै जना जिल्ला प्रहरी कार्यालय, अछामको थुनुवा कक्षमा रहेको प्रहरीले जानकारी गराएको छ । उनीहरूको विरुद्धमा अभद्र व्यवहार अन्तर्गत मुद्दा दर्ता गरिएको जिल्ला प्रहरी कार्यालय अछामका प्रमुख, प्रहरी नायब उपरीक्षक ईश्वरी भण्डारीले जानकारी गराए ।
गाउँपालिकाका उपाध्यक्षकी श्रीमतीको निवेदनको आधारमा दुई जना युवकलाई पक्राउ गरिएको बताउदै उनले अनुसन्धान र प्रमाणका आधारमा उनीहरूलाई थप मुद्दा समेत चलाउन सकिने बताए । साँफेबगरमा आयोजना गरिएको तिज प्रतियोगितामा सहभागी हुन आवश्यक रिहर्सल गरिरहेका बेला बोहरा र साउँदले मदिराको तालमा ढोकामा लात्ती बजार्दै भित्र प्रवेश गरेको आरोप छ ।
कार्यालय भित्र प्रवेश गरेका उनीहरूको कुटपिटबाट चदाराको टाउको र खुट्टामा चोट लागेको छ । पालिका छिरेर अपशब्द बोलेका उनीहरूले मेल्लेख प्रहरी चौकीको प्राङ्गणमा समेत गालीगलौज गर्न थालेपछि प्रहरीले उनीहरूलाई नियन्त्रणमा लिएको प्रहरीले जानकारी गराएको छ ।
