भदौ १७ धनगढी । सुदूरपश्चिम प्रदेशमा पर्यटन विकास कार्यक्रम अन्तर्गत भौतिक पुर्वाधार र प्रवर्द्धनमा साढे पाँच करोड खर्च गरिएको छ । गत आर्थिक बर्षमा सुदूरपश्चिम प्रदेशको उद्योग, पर्यटन, वन तथा वातावरण मन्त्रालय अन्तर्गतको पर्यटन विकास कार्यक्रम कार्यान्वयन ईकाइले साढे पाँच करोड खर्च गरेको हो ।
भौतिक पूर्वाधार अन्तरगत पर्यटकीय आवास गृह,अपिनप्पा संरक्षण क्षेत्रमा एक तले भवन निर्माण, गोदावरीको रामजानकी मन्दिरको लेन्टर,शिवपुरी धामको ट्रस निर्माण, बेहडाबाबाको ४ वटा कलात्मक ढोका निर्माण, मालिकाअर्जुनमा यात्रु प्रतिक्षालय को ट्रस निर्माण गरिएको इकाइका डवल बहादुर बोहराले बताए ।
परशुरामधाममा पानीको फोहरा निर्माण ,चिडिया ताल घोडाघोडीमा पर्यटकीय पदमार्ग, टिकापुरमा डल्फिन अवलोकन आउने पर्यटकका लागि आवास गृह निर्माण,टिकापुरमै होम कुण्ड निर्माण,गोदावरीे ४ मा गाजरी झर्नामा पर्यटकीय पदमार्ग निर्माण गरिएको छ ।
कञ्चनपुरको भम्किने धामको मन्दिरमा लेन्टर फिनिसिङ र गौरीगंगा १ मोहन्यालमा धार्मिक वनमा पर्यटकिय पार्क निर्माण गरिएको उनले वताए । त्यस्तै पर्यटन प्रर्बदनमा डडेल्धुरा देखि खप्तड सम्म साइकल यात्रा, खानिडाँडा देखि डडेल्धुरा सम्म साइकल यात्रा झिग्रानामा ७ दिने नेचर गाइड तालिम,घोडाघोडी र कञ्चनपुरको पुरैना तालमा चरा अवलोकन अध्ययन भ्रमण गरिएको उनले बताए ।
होटल आतिथ्यता तालिम तथा अवलोकन भ्रमण,मायाको चिनो झोला उत्पादन तयारी तथा वितरणका काम गरिएको उनले बताए । बजेट बढी विनियोजन गर्रिएको भए पनि इविडिङ गर्दा घटेर आउनाले साढे पाँच करोडले गर्नुपर्ने काम अपुग भएको उनले जानकारी गराए ।
