भदौ १७ धनगढी । तीन वर्षको अवधिमा सुदूरपश्चिम प्रदेशमा एक हजार सात सय ३० जनाले आत्महत्या गरेका छन् । सुदूरपश्चिम प्रदेश प्रहरी कार्यालय, धनगढी कैलालीले दिएको जानकारी अनुसार आत्महत्या गर्नेहरू मध्ये एक हजार चार सय पाँच जनाले झुन्डिएर आत्महत्या गरेका छन् । त्यस्तै, दुई सय ५४ जनाले विष सेवन गरेर, १७ जनाले आगो लगाएर, ३१ जनाले पानीमा हाम फाली डुबेर, ९ जनाले करेन्ट लाएर, १२ जनाले हाम फालेर र दुई जनाले हात हतियार खरखजाना प्रयोग गरी आत्महत्या गरेको प्रदेश प्रहरी कार्यालयको अभिलेखले देखाएको छ ।
त्यसैगरी गत वर्ष ०८०÷०८१ मा पाँच सय ९७ जनाले आत्महत्या गरेका छन् । गत वर्ष झुन्डिएर चार सय ७२, विष सेवन गरेर ७३ जना, पानीमा हाम फाली डुबेर २५ जना, आगो लगाएर १६ जना, करेन्ट लगाएर सात जना, हाम फालेर दुई जना र हात हतियार खरखजाना प्रयोग गरी दुई जनाले आत्महत्या गरेका छन् । आर्थिक वर्ष ०७९÷०८० मा पाँच सय ५७ जनाले आफ्नो जीवन आफै समाप्त गरेका छन् । त्यस अवधिमा झुन्डिएर चार सय ६७ जना, विष खाएर ७९ जना, पानीमा हाम फाली डुबेर पाँच जना, हाम फालेर पाँच जना र करेन्ट लाएर एक जनाले अकालमै ज्यान गुमाएको तथ्याङ्क प्रदेश प्रहरी कार्यालयले उपलब्ध गराएको छ ।
त्यसैगरी आर्थिक वर्ष ०७८÷०७९ मा पाँच सय ७६ जनाले आत्महत्या गरेका छन् । जसमा झुन्डिएर आत्महत्या गर्नेको संख्या चार सय ६६ रहेको छ । त्यस्तै, विष खाएर एक सय दुई जना, हाम फालेर पाँच जना, करेन्ट लाएर एक जना, आगो लाएर एक जना र पानीमा हाम फाली डुबेर एक जनाले आत्महत्या गरेको प्रहरी अभिलेखले देखाएको छ । प्रदेशका नौ वटा जिल्ला मध्ये कैलालीमा आत्महत्या गर्नेको संख्या सबैभन्दा बढी रहेको छ । कैलालीमा तीन वर्षको अवधिमा सात सय ८२ जनाले आत्महत्या गरेका छन् । ०७८÷०७९ मा दुई सय ५९ जना, ०७९÷०८० मा दुई सय ५८ र गत आर्थिक वर्षमा दुई सय ६५ जनाले आत्महत्या गरेका छन् ।
त्यसैगरी कञ्चनपुरमा तीन वर्षको अवधिमा चार सय ३० जनाले आत्महत्या गरेका छन् । कञ्चनपुरमा ०७८÷०७९ मा एक सय ३६ जना, ०७९÷०८० मा एक सय २७ जना र गत आर्थिक वर्षमा एक सय ६७ जना गरी चार सय ३० जनाले आत्महत्या गरेको प्रहरीे अभिलेखले देखाएको छ । सुदूरपश्चिम प्रदेशमा सात वटा पहाडी जिल्लाहरू मध्ये सबैभन्दा बढी आत्महत्याका घटना हुने जिल्ला बैतडी देखिएको छ । बैतडीमा तीन वर्षको अवधिमा ९२ जनाले आत्महत्या गरेका छन् । ०७८÷०७९ मा ३६ जना, ०७९÷०८० मा २५ जना र गत आर्थिक वर्षमा ३१ जनाले आत्महत्या गरेका छन् । उक्त अवधिमा डडेल्धुरा जिल्लामा ८१ जनाले आत्महत्या गरेका छन् ।
०७८÷०७९ मा २७ जना, ०७९÷०८० मा ३० जना र गत आर्थिक वर्षमा २४ जनाले आत्महत्या गरेका छन् । प्रदेश प्रहरी कार्यालयका अनुसार अछाममा ०७८÷०७९ मा ३३ जना, ०७९÷०८० मा २४ जना र गत आर्थिक वर्षमा २१ गरी ७८ जनाले आत्महत्या गरेका छन् । त्यस्तै, तीन वर्षको अवधिमा बझाङमा ७४ जनाले आत्महत्या गरेका छन् । बझाङमा ०७८÷०७९ मा २६ जना, ०७९÷०८० मा २६ जना र गत आर्थिक वर्षमा २२ जनाले आत्महत्या गरेका छन् ।
पहाडी जिल्लामा हुने आत्महत्याका घटनाको आधारमा डोटी जिल्ला पाँचौँ स्थानमा देखिएको छ । डोटीमा आर्थिक वर्ष ०७८÷०७९ मा ३२ जना, ०७९÷०८० मा २४ जना र गत आर्थिक वर्षमा २७ जना गरी तीन वर्षको अवधिमा ७३ जनाले आत्महत्या गरेको प्रहरी तथ्याङकले देखाएको छ । त्यसैगरी दार्चुला जिल्लामा पनि तीन वर्षको अवधिमा ७० जनाले आत्महत्या गरेको तथ्याङ्क रहेको छ । ०७८÷०७९ मा २४ जना, ०७९÷०८० मा २७ जना र गत आर्थिक वर्षमा १९ जनाले आत्महत्या गरेका छन् ।
प्रहरीको तथ्याङ्क अनुसार सुदूरपश्चिमका नौ वटै जिल्ला मध्ये आत्महत्याका घटना कम हुने जिल्ला बाजुरा देखिएको छ । बाजुरामा तीन वर्षको अवधिमा ५१ जनाले आत्महत्या गरेका छन् । ०७८÷०७९ मा नौ जना, ०७९÷०८० मा २२ जना र गत आर्थिक वर्षमा २० जनाले आत्महत्या गरेका छन् । वर्षेनि आत्महत्याका घटनाहरू बढ्दै भएका छन् । सोचे अनुसारको प्राप्ति नहुनु, परीक्षामा असफल हुनु, घरेलु हिंसा, प्रेममा असफल हुनु जस्ता कारणहरुले मानिसहरुले आत्महत्याको बाटो रोज्ने गरेको प्रहरीको भनाई छ ।
