भदौ १५ काठमाडौँ । नेपाल समाजवादी पार्टी नेपालका अध्यक्ष एवम् पूर्व प्रधानमन्त्री बाबुराम भट्टराईले राजनीतिक क्षेत्रमा दलितहरूलाई १४ प्रतिशत सिटमा आरक्षण दिनुपर्ने बताएका छन् । शनिबार काठमाडौंको माइतीघर मण्डलामा जारी दलितका लागि दलित अभियानको आन्दोलनमा ऐक्यबद्धता जनाउँदै अध्यक्ष भट्टराईले राजनीतिक क्षेत्रमा दलितहरूलाई १४ प्रतिशत सिटमा आरक्षण दिनुपर्ने बताएका हुन् ।
‘हामीले महिलालाई ३३ प्रतिशत आरक्षणको व्यवस्था गरेका छौँ । मैले त पहिले पनि दलितलाई १४ प्रतिशत आरक्षण दिएर जाऔँ भनेको हुँ । अब पनि दलितलाई राजनीतिक क्षेत्रमा पनि प्रष्टरुपमा १४ प्रतिशत आरक्षण दिएर जानुपर्छ,’ उनले भने । दलित समुदायमाथिको जातीय विभेदमात्रै नभई राजनीतिक, आर्थिक र सामाजिक रुपमा भएका सबै विभेदको निराकरण गर्नेगरी राज्यले कानुन बनाएर पहल लिनुपर्ने उनले बताए ।‘जो पीडित छ ।
उसले उठेर मलाई अधिकार चाहियो भन्नै पर्छ । त्यसपछि उत्पीडित समुदायको अधिकारका लागि हामी जस्ता समाजका अगुवाहरूले पनि साथ दिनुपर्छ । यो जातीय विभेद भनेको दलितले बनाएको होइन । त्यसकारणले दलितले मात्रै समाधान गर्न सक्ने कुरा पनि होइन,’ उनले भने । ‘यसमा गैरदलितको पनि साथ हुनुपर्छ । धार्मिक सांस्कृतिक रूपमा बनेका मान्यताहरूलाई तोडेर समाजलाई अगाडि बढाउन सक्नु पर्छ ।
अध्यक्ष भट्टराईले संविधानको धारा ४० ले दलित समुदायलाई शिक्षा, स्वास्थ्य, भूमि जस्ता विषयहरुमा शशक्तिकरण गर्नुपर्ने ब्याबश्था गरेको बताउदै त्यसको कार्यान्वयनका लागि सरकारले ध्यान दिनुपर्ने बताए । ‘दलितलाई निःशुल्क शिक्षाको व्यवस्था गर्नुपर्छ,’ उनले भने, ‘आर्थिक अभावकै कारण दलितले अहिले पढ्न पाएका छैनन ।
अब एकैपटक हजारौँ दलितहरूले मास्टर पीएचडी गर्छन् । उनीहरूको आर्थिक सबलीकरण हुन्छ । त्यसले समाजलाई समतामूलक बनाउन मद्दत पुग्छ । यो जातीय विभेद जस्तो अमानवीय व्यवहारको अन्त्य गर्न सहयोग नै पुग्छ ।’उनले जाति प्रथाको समस्या समाधानका लागि दक्षिण एसियामा अम्बेडकरको दर्शन चर्चित रहेको भन्दै सय वर्ष अगाडि अम्बेडकरले थालेको अभियानलाई निरन्तरता दिनुपर्ने बताए ।
