भदौ १५ काठमाडौं । पत्रकार दीर्घराज उपाध्यायद्वारा लिखित पुस्तक ’द्वन्द्व पत्रकारिताको एक दशक’ पुस्तक विमोचन गरिएको छ । पूर्वप्रधानमन्त्री समेत रहेका नेपाली कांग्रेसका सभापति शेरबहादुर देउवाले द्वन्द्व पत्रकारिताको एक दशक’ पुस्तक विमोचन गरेका हुन् । पुस्तक विमोचन गर्दै कांग्रेसका सभापति शेरबहादुर देउवाले लेखक तथा पत्रकार उपाध्यायलाई शुभकामना व्यक्त गरेका छन् । पूर्व प्रधानमन्त्री समेत रहेका कांग्रेस सभापति देउवाले कैलालीको आमखैयामा आफूमाथि भएको आक्रमणको घटनाको पनि स्मरण गरेका छन् ।
उनले देशमा युद्धविराम भएको अबश्थामा आफुमाथी आक्रमण भएकोे बताए । उनले द्वन्दकालको स्मरण गर्दै उनले माओवादीले ४० बुँदे माग गरे पनि वार्ताका लागि तयार नभएको बताए । देउबाले सशस्त्र द्वन्दलाई सफलतापूर्वक शान्ति प्रक्रियामा ल्याएको र संविधानसभाबाट संविधान जारी गर्दै गणतन्त्रीक व्यवस्थामा आएको बताए । संविधानलाई पनि अझै राम्रो बनाउन संशोधन गरेर अघि बढ्न सकिने बताउदै उनले प्रजातन्त्रको विकल्प प्रजातन्त्र नै भएकाले यसलाई सुदृढ गर्दै लैजाने सकिने बताए । पुस्तक भोलिको पुस्ताका लागि अध्ययन सामाग्री हुने बताए ।
पुस्तकका विषयमा बोल्दै नेकपा एमालेका सचिव लेखराज भट्टले द्वन्द्वकालमा सुदूरपश्चिममा ब्यक्ति केन्द्रित हत्या हुन नदिएको र आफू ती घटनाहरुको साक्षी भएको बताए । उनले द्वन्द्वकालमा पूर्वप्रधानमन्त्री शेरबहादुर देउवामाथि आक्रमण गर्ने कुनै पनि योजना नभएको जिकिर गर्दै त्यो समयमा उपयुक्त रुपमा सही सूचना सञ्चार नहुँदा गलत सूचना फैलिएको बताए । डोटीको छेडा घटना स्मरण गर्दै उनले लगभग २५ जना मारिएको बताए ।
जसमा ५ जना गाउँलेहरू भएको र बाँकी माओवादी कार्यकर्ता भएको उनले बताए । दुईजना भर्खरका युवतीहरूको बलात्कार गरिएको बताउदै उनले त्यो तत्कालीन राज्यपक्षबाट घटाइएको घटना भएको बताए । पेुस्तकका बारेमा चर्चा गर्दै नेपाली कांग्रेसका केन्द्रीय सदस्य नैनसिंह महरले यो पुस्तकले द्वन्द्वकालमा भएका घटनाहरुको दस्तावेजीकरण गरेको र आगामी दिनको पत्रकारिताका लागि प्रेरणा र अनुसन्धानकर्ताहरुका लागि स्रोत सामाग्री बन्ने बताए ।
पुस्तकमाथि टिप्पणी गर्दै पत्रकार महासंघका अध्यक्ष विपुल पोख्रेलले यो पुस्तक अहिलेको नयाँ पुस्ताका पत्रकारहरुका लागि उपहार भएको बताए । ्पुस्तकमाथि टिप्पणी गर्दै वरिष्ठ पत्रकार कुन्द दीक्षितले फेरि द्वन्द्वलाई दोहोरिन नदिन पुस्तक सहयोगी हुने बताए् । पुस्तक शान्ति पत्रकारिताको अद्भुत नमुना भएको बताउदै उनले पुस्तकले द्वन्द्वलाई बीर्सन नदिने बताए । आफूलाई मार्न खोज्नेसँग मिलेरसँगै सहभागी हुनु शान्ति प्रक्रियाको सफलता मान्न सकिने वरिष्ठ पत्रकार दीक्षितले बताए ।
त्यस्तै पुस्तकमाथि टिप्पणी गर्दै वरिष्ठ पत्रकार बविता बस्नेतले द्वन्द्वकालमा भएका घटनाहरुको फेहरिस्त भएको बताईन । उनले द्वन्द्वकालमा कसरी रिपोर्टिङ गरियो र कस्तो समयबाट नेपाली पत्रकारिता गुज्रिएर यहाँसम्म आइपुग्यो भन्ने बुझ्न पुस्तक सहयोगी हुने बताईन । पुस्तकका लेखक उपाध्यायले यो पुस्तक द्वन्द्वकालमा नेपाली पत्रकार र आमसञ्चार जगतले जे भोग्यो त्यो समयको दस्तावेज भएको बताए ।
