भदौ १४ धनगढी । सुदूरपश्चिम प्रदेश संसदीय दलको नेता पुनः खगराज भट्टलाई बनाउन माओवादी केन्द्रले निर्णय गरेको छ । माओवादी केन्द्रीय तथा प्रदेश पदाधिकारी र केन्द्रीय समितिको धनगढीमा भएको परामर्श बैठकमा भट्टलाई पुनः संसदीय दलको नेता बनाउने माओवादी केन्द्रले निर्णय गरेको हो ।
बैठकपछि अध्यक्ष पुष्पकमल दाहाल प्रचण्डले प्रदेश संसदीय दलको नेता भट्टलाई बनाउने निर्णय भएको स्पष्ट पारेका थिए । भट्ट २०७९ सालको निर्वाचन पछि माओवादी केन्द्र प्रदेश संसदीय दलको नेता चयन भएका थिए । तर, गत वर्ष उनलाई हटाएर मान बहादुर धामीलाई दलको नेता चयन गरिएको थियो । सुदूरपश्चिम प्रदेश सभामा माओवादी केन्द्रका सभामुख सहित ११ जना प्रदेश सभा सदस्य रहेका छन् ।
माओवादी केन्द्र प्रदेश संसदीय दलमा सुरुदेखि नै दुई धार देखिँदै आएको छ । माओवादी केन्द्रका अध्यक्ष पुष्पकमल दाहाल प्रचण्डले आफ्नो नेतृत्वको सरकारले राम्रो काम गर्न थालेपछि एमाले र काँग्रेसले अत्तालिएर नयाँ गठबन्धन बनाएको आरोप लगाएका छन । आफ्नो नेतृत्वको सरकारले भ्रष्टाचार बिरुद्ध कडाई गरेपछि काँग्रेस र एमालेको सरकार बनेको उनले बताउका थिए । अध्यक्ष प्रचण्डले काँग्रेस र एमालेले व्यापारीको घरमा बसेर मध्यरातीमा नयाँ सरकार बनाएको समेत दाबी गरेका थिए ।
दुई तिहाईको दम्भमा चलेको वर्तमान सरकार गलत बाटोमा गइरहेको समेत उनले बताएका थिए । सरकार नसच्चिए सडक आन्दोलनमा उत्रिन बाध्य हुने चेतावनी दिएका अध्यक्ष प्रचण्डले सडक आन्दोलनको अवस्था आएमा बंगलादेशको जस्तो स्थिति सिर्जना हुने हेक्का राख्न सरकारलाई सुझाएका थिए ।
