भदौ १४ बाजुरा । बाजुराको हिमाली गाउँपालिका वडा नम्बर २ रुम्दिमा गएकोे पहिरोले कवाडी नदि थुनिए पछि आसपासका बासिन्दालाई सतर्कता अपनाउन आग्रह गरिएको छ । शुक्रवार बिहान करिब १० बजेको समयमा रुम्दिमा गएको सुख्खा पहिरोले कवाडी नदि थुनिए पछि आसपासका बासिन्दालाई सतर्कता अपनाउन आग्रह गरिएको हो ।
खोलामा एक्कासी अत्याधिक मात्रामा पानीको बहाव घटेपछि स्थानीयबासीले त्रसित हुदैँ प्रहरीलाई खबर गरेको बताईएको छ । सुख्खा पहिरोले थुनिएको खोलामा करिब १२ बजेसम्म केहि पानीको सतह बढेको जिल्ला प्रहरी कार्यालय बाजुराले जानकारी दिएको छ । पहिरोले हिमाली गाउँपालिका २, ४ र ५ लगायतका वडाका अधिकांश वस्तीहरु डुवानको उच्च जोखिममा रहेको प्रहरीले जनाएको छ ।
खोलामा करिब ८० प्रतिशत घटेको पानीको सतह केहि बढेपनि जोखिम भने कायमै रहेको जिल्ला प्रहरी कार्यालय बाजुराका प्रहरी निरिक्षक रबिन्द्रसिंह कार्कीले बताए । अहिले प्रहरीको टोलि पनि सम्बन्धित क्षेत्रमा खटिएको र आसपासका नागरिकलाई सतर्कता अपनाउन आग्रह गरेको उनले बताए ।
त्यसैगरी हिमाली गाउँपालिकाले पनि रुम्दिमा गएको पहिरोले कवाडी खोला थुनिए पछि आसपासका बासीन्दाहरुलाई सतर्कता अपनाउन आग्रह गरेको छ । गाउँपालिकाले सूचना जारी गर्दै कवाडी र कर्णाली नदिमा कुनै पनि समयमा पानीको बहाव बढ्न सक्ने हुँदा आसपासका बासीन्दाहरुलाई सजग रहन अुनरोध गरेको हो ।
