साउन २२ धनगढी । सुदूरपश्चिम प्रदेशमा रात्रिकालीन यातायात बन्द गरिएको छ । गृह मन्त्रालयको निर्देशन अनुसार तीन दिन पहाडी जिल्लाको रात्रिकालीन यातायात सेवा बन्द गरिएको हो ।
सुदूरपश्चिम प्रदेशका पहाडी जिल्लाहरूमा वर्षा हुने र वर्षाका कारण सार्वजनिक यातायातमा क्षति तथा मानवीय क्षति हुन सक्ने भन्दै गृह मन्त्रालयले तीन दिन रात्रिकालीन यातायात बन्द गरेको हो । पहाडी जिल्लामा रातिको समयमा आउने पहिरोले क्षति गर्ने अनुमान सहित यातायात बन्द गरिएको हो ।
राति ८ बजे देखि बिहान ४ बजेसम्म सुदूरपश्चिम प्रदेशका सात वटा पहाडी जिल्लाको यातायात सेवा तीन दिन बन्द गरिएको हो । काठमाडौँ, धनगढी, महेन्द्रनगर, टीकापुर लगाएतका क्षेत्रबाट पहाडी जिल्ला र पहाडी जिल्लाबाट तराइ आउने रात्रिकालीन सवारी साधनहरू तीन दिन सञ्चालन नहुने सुन्दर सुदूरपश्चिम यातायात प्रालिका अध्यक्ष पदम सापकोटाले बताए ।
सार्वजनिक यातायात कम्पनीहरूको दैनिक तालिकामा समस्या आउने बताउदै सापकोटाले राति र दिउँसो सञ्चालन हुने सार्वजनिक सवारीका साधनहरू फरक–फरक भएको बताए ।
पहाडी जिल्लाहरूमा रात्रि सेवाका सार्वजनिक सवारीहरू दिउँसोको तुलनामा धेरै भएको बताउदै उनले दिउँसो मात्र सार्वजनिक सवारी सञ्चालन हुने भएपछि यात्रुलाई समेत समस्या हुने बताए । जल तथा मौसम विज्ञान विभागले सुदूरपश्चिमलाई मनसुनी वर्षा हुने भएकाले ‘रेड जोन’मा रखेको छ ।
