जेठ ३२ अछाम । अछामको एक स्वास्थ्य चौकिको फ्रीजमा बियरका बोतल राखेको पाइएको छ । अत्यावस्यक खोप लगायतका स्वास्थ्य सामग्री राख्न प्रयोग गरिएको जिल्लाको मष्टाबण्डाली स्वास्थ्य चौकीको ‘फ्रिज’ मा बियरका बोतल राखेको भेटिएको हो ।
कमलबजार नगरपालिका वडा नम्बर–९ मष्टाबण्डाली स्वास्थ्य चौकीमा स्थानीयको एक समूहले गएर हेर्दा ‘फ्रिज’ मा तीन वटा बियरका बोतल राखेका पाइएको हो । उक्त स्वास्थ्य चौकीमा कार्यरत एक जना स्वास्थ्यकर्मीले बियरका बोतल राखेको नाम उल्लेख नगर्ने सर्तमा एक जना स्थानीय अगुवाले बताए ।
स्वास्थ्य चौकीको ‘फ्रिज’ मा बियरका बोतल भेटिएको भिडियो सामाजिक सञ्जालमा आए पछि चौतर्फी विरोध भएको छ । बियरका बोतल राख्नमा संलग्नलाई कानुनी कारबाहीको माग गरिएको छ ।
स्वास्थ्य चौकीको ‘फ्रिज’ मा बियरका बोतल राखेको बारेमा आफूले मिडियाबाट जानकारी पाएर अचम्ममा परेको कमलबजार नगरपालिकाका प्रमुख चक्र बहादुर विष्टले जानकारी दिए । केही समय अघिबाट नै स्वास्थ्य चौकीको ‘फ्रिज’ मा बियरका बोतल राख्ने गरेको कुराहरू बाहिरिँदै आएको बताइएको छ ।
